A agrupación de Asociacións Culturais Mariña Cultura convida a participar na mobilización das Letras Galegas en Foz

A plataforma unitaria Queremos Galego, impulsada pola Mesa pola Normalización Lingüística e conformada por máis de 700 entidades co obxectivo de defender a lingua de Galiza, convoca a unha mobilización que se vai realizar nas sete cidades galegas para o vindeiro sábado 17 de maio ás 12 horas.

A agrupación de Asociacións Culturais Mariña Cultura non quere ser menos e súmase a esta mobilización cun acto que se vai realizar o día 17 de maio ás 12 horas na praza conde de Fontao de Foz.

A asociación cultural A Pomba do Arco, como anfitrioa do evento, quere convocar a tódalas persoas e asociacións culturais a que acudan a este acto de reivindicación da nosa lingua, no que se recitarán poemas de Xosé María Díaz Castro, autor ao que se lle dedica este ano o Día das Letras Galegas, darase lectura ao manifesto escrito por Marica Campo e para facer máis ameno o acto contaremos cas actuacións da Charanga da Banda de Burela e grupo musical Tumba e dalle.

Porque queremos galego nas escolas, nos medios de comunicación, na publicidade, na administración, na xustiza, na oferta de lecer, no comercio, nas artes e letras… Debe ser a lingua obxecto de uso e de defensa tódolos días do ano en tódolos lugares e momentos, porque no é un adorno ou unha peza cultural: é o noso ser e precisa dunha defensa cívica e dun amor colectivo e dunha mobilización social.

A asociación cultural A Pomba do Arco, como membro de Mariña Cultura, e como anfitrioa do evento quere animar ao conxunto da sociedade da Mariña a participar na concentración a favor da nosa lingua como mostra de dignidade. Reivindicamos que o galego dea pasos adiante que contrarresten tantos pasos atrás, algún deles moi recentes como foi o retroceso que sufriu a lingua galega nas aulas de Galicia.

Acudide a celebrar con nós o día das Letras Galegas, o día do Galego, a Foz, o 17 de maio ás 12 do mediodía na praza Conde de Fontao.