Alfonso Villares : “Besteiro e a Deputación persiguen politicamente ós concellos do PP que teñen GES”

SANTIAGO. O alcalde de Cervo e portavoz do PP na Fegamp, Alfonso Villares, denunciou este venres a “estratexia premeditada” do presidente da Deputación de Lugo, José Ramón Gómez Besteiro, de acosar aos concellos lucenses con Grupos de Emerxencia Supramunicipal (GES), mediante o atraso no abono das cantidades que corresponden á institución provicial.

Segundo detallou, “están a dar escusas falsas para atrasar o pago dos anticipos correspondentes ao ano 2013, diñeiro que teñen que adiantar os concellos”. Villares lembrou que, no modelo dos GES asinado en xaneiro do pasado ano, o financiamento das emerxencias repártese entre Xunta (60%), deputacións (20%) e os concellos onde se establecen as bases dos grupos (20%).

Os concellos afectados son os de Folgoso do Courel, Quiroga e Guitiriz, que aínda manteñen retido o anticipo de 2013 mentres a Deputación “examina unha documentación que lles esixiu hai un mes, baixo ameaza de que se non a presentaban, perderían o diñeiro que lles corresponde por convenio”.

A Deputación alega que estes informes e xustificantes esixidos en abril son como consecuencia de supostas anomalías nos procesos de selección de persoal nestes tres concellos. “Pero estas anomalías foron rexeitadas até en tres ocasiones pola comisión de seguimento dos GES, onde están representadas todas as deputacións, os concellos e as consellerías da Xunta”, explica Villares, “houbo unha votación e determinouse que de existir algunha, non eran suficientes como para negarse a cumprir coas obrigas económicas do convenio”.

Ao seu xuízo, todo enmárcase “nunha persecución política aos concellos da provincia onde goberna o PP, unha discriminación continua desde a Deputación que agora ten como obxectivo os GES pero para a que a Besteiro lle vale calquera motivo”.

O alcalde de Cervo lamentou que a de Lugo sexa “a única Deputación na que o convenio do GES atopa obstáculos e dificultades”, xa que “no resto de provincias, os alcaldes de toda cor política reciben as transferencias que lles corresponden de Xunta e deputacións sen que haxa este acoso e estas ameazas”.

Para Villares, “o preocupante non é en si a asfixia financeira a que se somete a concellos pequenos con recursos moi limitados”, senón “que se pon en risco un servizo básico como é a cobertura de emerxencias nunha zona de enorme dispersión como é a montaña lucense”. E todo iso, “de maneira irresponsable”, unha actitude que reprochou directamente ao presidente da Deputación, Gómez Besteiro.
Por último, Alfonso Villares criticou que “algúns entendan as deputacións só para beneficiar aos concellos do seu partido e perseguir aos do contrario”, unha actitude que “concorda pouco co discurso de transparencia e novos tempos que Besteiro tenta vender”.