Baixo o lema “galego, o paso adiante” celebrouse en Foz unha nova edición do Correlingua

Foz, 16 de maio de 2014. O vicepresidente da Deputación de Lugo, o nacionalista Antonio Veiga, participou, este venres, nunha nova edición do Correlingua en Foz, carreira a prol da lingua na que tomaron parte milleiros de rapaces procedentes de todos os ciclos educativos dos distintos centros de ensino da comarca da Mariña, organizada pola CIG-Ensino, a Asociación Socio-Pedagóxica Galega (AS-PG) e a Mesa pola Normalización Lingüística, coa colaboración dos Concellos de Pontevedra, Vigo, Lugo e Ourense, xunto coa Deputación de Lugo.

O Correlingua 2014, percorreu este venres Foz, a última carreira deste ano, pero en total percorreu doce localidades galegas entre o 5 e o 16 de maio, baixo o lema: “Galego, o paso adiante” en diálogo aberto co escritor lugués homenaxeado este 2014, Xosé María Díaz Castro, quen, no inesquecíbel Penélope, falaba do abalar da historia de Galiza: “un paso adiante e outro atrás, Galiza, e a tea dos teus soños non se move”. Pois ben, neste ano en que se cumpre o 1º centenario do nacemento do escritor, o Correlingua quere responder desde o presente que avanzamos coa nosa lingua, porque o galego é un deses pasos adiante que citaba o poeta.

Neste sentido, Antonio Veiga destacou “a importancia de contarmos con actividades coma esta que, desde unha perspectiva lúdica e reivindicativa, permítenlle ao alumnado reflexionar sobre a situación do noso idioma e reclamar o seu dereito a vivir en galego”.

Cada unha das doce carreiras, como aconteceu nesta de Foz, rematou nunha festa final en que se deu lectura ao manifesto gañador e na que actuou un dos grupos gañadores do Cantalingua, outro dos certames do Correlingua, en que os grupos seleccionados foron elixidos polo alumnado e o profesorado dos seguintes centros IES de Arzúa, IES Vicente Otero Valcárcel de Carral, IES Lama das Quendas de Chantada, IES Joham Carballeira de Bueu e IES Pino Manso do Porriño que seleccionaron como gañadores a Superoito, Monoulious Dop e Quempallou.

Como todos os anos cóntase, para conducir o acto da festa final, cunha persoa de relevo, que nesta ocasión é a actriz Isabel Risco, recente gañadora do premio Mestre Mateo á mellor actriz de reparto na serie Era Visto!.