O Concello de Burela aprobará este xoves as novas condicións do crédito solicitado para o pago a provedores

Burela, 11 de xuño de 2014. Mañá celébrase pleno extraordinario no Concello burelés para aprobar as novas condicións do crédito solicitado para o pago a provedores, que lle permitirá aforrar uns 120.000 euros. Unha parte deses cartos, segundo o alcalde, José Mª González Barcia, irán destinados á construción da nova gardería infantil.

O rexedor explicou que “un dos puntos que veremos no pleno é a adecuación a unhas novas condicións do crédito solicitado no seu día para o pago anticipado a provedores. Cando chegamos encontrámonos con 1.300.000 euros en facturas, herdadas todas elas do bipartito. Conseguíronse pagar con fondos propios 200.000 euros e para o resto, 1.100.000 euros, houbo que solicitar un crédito acolléndonos ao pago anticipado a provedores. Ese crédito tiña un interese nominal do 5,57 con dous anos de carencia, durante os cales hai que pagar intereses, e oito anos de amortización”.

González Barcia indicou que “o Ministerio de Hacienda enviounos unha proposta a través da cal podemos conseguir unha rebaixa substancial do tipo de interese. En concreto vamos acollernos a unha rebaixa de 1,30 puntos, co cal o tipo de interese vai quedar no 4,20 por cento. As vantaxes disto son que pagamos practicamente un 20 por cento menos de intereses e gañamos un ano máis de carencia, o que nos permite liberar aproximadamente 120.000 euros que irían destinados a amortización de capital para outras actuacións. En concreto é previsible que ese diñeiro se destine en boa medida a financiar a parte que lle toca ao Concello para a construción da nova gardería infantil”.

O alcalde burelés dixo que “tiñamos que empezar a amortizar capital o vindeiro día 1 de xullo, pero con estas novas condicións comezaremos o 1 de xullo do ano próximo. A amortización de capital que se debería facer este ano distribuirase entre os 7 anos que quedan. En todo caso o incremento da cota nos outros 7 anos vai ser perfectamente asumible polo Concello porque, entre outras cousas, no ano 2017 deixará de pagar o crédito derivado da herdanza do goberno socialista do antigo Concello de Cervo. Polo tanto ante estas condicións non do dubidamos nin un só momento”.

González Barcia agarda que “espero que a oposición sexa responsable e consecuente, porque xeraron este problema co cúmulo de facturas que deixaron sen pagar. Esperamos que sexan sensatos e que non poñan ningún tipo de traba a esta modificación do financiamento do crédito”.

E engadiu que “o pleno ten que celebrarse con carácter extraordinario e urxente xa que o prazo para acollerse a estas novas condicións do crédito do pago anticipado a provedores remata o día 14. Evidentemente seríamos uns irresponsables se renunciaramos a mellorar as condicións de financiamento do crédito porque, en definitiva, van repercutir favorablemente no conxunto da cidadanía de Burela”.

Escola infantil
O rexedor contou que “o segundo punto do pleno é a formalización da adquisición do solar onde se vai situar a nova gardería. O trámite fíxose a través do procedemento de expropiación forzosa de mutuo acordo, xerouse o crédito suficiente para poder abordar a compra e despois seguiremos o procedemento administrativo marcado na lei para levar a cabo a acta de ocupación da finca, proceder ao pago e poñer o solar a disposición da Xunta de Galicia. Non se fixo antes porque en Burela non había ningún solo dotacional para situar a nova escola infantil e houbo que esperar á aprobación definitiva do plan xeral de ordenación municipal para contar con bolsas de solo dotacional que cumpran cos requisitos urbanísticos e xurídicos para poder ofertar este solo á Consellería de Traballo e poder executar a nova escola infantil”.

González Barcia subliñou que “o proxecto básico da nova gardería está a piques de rematarse e no momento en que se reciba no Concello e cumprindo todos os trámites legais concederáselle licenza de obra”.