Emigrantes Retornados volven concentrarse diante da delegación de Facenda en Foz e anuncian que intensificarán as súas protestas

A Mariña, 4 de novembro de 2014. O colectivo de Emigrantes Retornados da Mariña volveu concentrarse este martes en Foz diante da Delegación da Facenda do Estado e anuncian que van intensificar a presión poñéndolle nomes e apelidos aos responsábeis políticos aquí, en Compostela, en Madrid e na Mariña. Afirman que os alcaldes do Partido Popular aprobaron a regañadentes as mocións de apoio ao colectivo pero despois non fan nada para presionar no seu partido e solucionar o problema, algúns mesmo votan en contra das nosas demandas como fixeron a semana pasada no Parlamento Galego, Vidal Martínez Sierra e José Manuel Balseiro.

Denuncian que a administración estatal de facenda segue remitindo cartas con requirimentos de pago onde se inclúen sancións e intereses, polo que acusan a facenda e ao Partido Popular de ofrecer parches como solucións ao tempo que seguen sangrando as nosas pequenas pensións.

Varios integrantes do colectivo asistentes á concentración rexistraron na Delegación de Facenda escritos dirixidos ao ministro Montoro coas seguintes demandas:

1.- Que non imos consentir que se lle dea unha solución simplemente cosmética ao noso contencioso coa Axencia Tributaria por atopármonos nas vésperas dun ano de importantes envites electorais, e que, pola contra adopten medidas eficaces para que a tributación das nosas pensións sexa xusta e igualitaria.

2.- Congratulámonos de que por fin saiba quen son os verdadeiros defraudadores, que non somos os e as pensionistas retornados. Porén iso non é suficiente e polo tanto trasladámoslle as propostas para que no ámbito da reforma fiscal se adopten decisións para resolver de verdade a nosa problemática.

3.- Os e as emigrantes retornadas non renunciaremos a que se modifique a lei 35/2006 para que as pensións das persoas retornadas tributen igual que a do resto dos galegos:

· Elaboración dun informe no que se poña de manifesto como por idénticas cantidades tributan máis que outros pensionistas.

· Que no paquete de modificacións legais se inclúan as modificacións na lei 35/2006 necesarias para garantir un trato igualitario. Concretamente o artigo 96 en relación co 17, de tal forma que se estableza a obriga de declarar a partir de 22.000 euros ano de ingresos e que para os restantes se estableza un réxime de retencións idéntico ao do resto dos e das pensionistas.

· Que tendo en conta que moitos emigrantes retornados para teren dereito á prestación sanitaria teñen que ou pagar no país de orixe un seguro ou establecer un convenio coa seguridade social española ( arredor de 90 €/mes) que estas cantidades se poidan incluír como gastos deducibles no IRPF, igual que xa ocorre cos gastos de seguridade social dos e das traballadoras.

4.- Hai cambios que para nós son esenciais na proposta de modificación legal remitida ás Cortes Xerais en relación coas pensións dos e das emigrantes retornadas:

· Modificar o texto remitido ás Cortes no sentido de que en ningún caso a obriga de presentar declaración do IRPF se aplique con carácter retroactivo. Polo tanto que o período de regularización só afecte a partir deste ano.

· Aclaración sobre como se vai realizar a devolución ás persoas que xa foron requiridas e que aboaron sancións e intereses: trámites a realizar. Do mesmo xeito que nos sancionaron e ameazaron con embargos de oficio, tamén de oficio deberán devolvernos os nosos cartos.

5.- E finalmente tamén lle fixemos ver que existen importantes lagoas na actuación da Axencia Tributaria que poden dar lugar a un trato discriminatorio aos emigrantes retornados e mesmo provocar que se vexan obrigados a tributar sen teren que facelo. Nalgúns casos incorrendo mesmo na dobre imposición que está explicitamente excluída nos convenios internacionais asinados polo Estado español. Nese sentido solicitamos:

· Informar a todas as persoas afectadas e que se indique quen ten obriga de incluír as pensións na declaración tendo en conta: país de procedencia das pensións, as sentenzas existentes, as resolucións do Tribunal Económico Administrativo e os cambios dos últimos anos nos diferentes convenios bilaterais.

· Solicitar información dos países de procedencia das pensións, sobre todo Suíza, para verificar que prestacións xa están sometidas a gravame no país de orixe para evitar a dobre imposición. (Hai persoas que por determinadas cantidades xa tributan no país de orixe malia o cal a AT lles reclama a súa inclusión na declaración).

· Pensións por incapacidade. Recoñecer de oficio o recoñecemento das invalideces realizadas nos países de procedencia coa finalidade de acreditar a exención na tributación de ditas pensións. (Actualmente hai persoas con incapacidade total no país de orixe, que segundo o INSS é equiparábel á absoluta, que están sendo requiridas pola AT para a súa tributación)

Os e as emigrantes retornadas non abandonaremos as nosas reivindicacións e mobilizacións até conseguir os obxectivos que consideramos de xustiza.

Tampouco deixaremos de sinalar co dedo a aqueles que como Montoro, Rajoy ou Feijóo pretenden só un enxaugue electoralista no canto de resolver o problema da nosa discriminación.

Colectivo de Emigrantes Retornados da Mariña.