A postal de Andrés Moreda Hermida, alumno de 11 anos do colexio Nosa Señora do Pilar, representará ao Concello de Foz na súa felicitación institucional de Nadal

Foz, 17 de decembro de 2014.- A Concellería de Cultura de Foz ven de facer público o nome do gañador do XIII Concurso de Postais de Nadal para este ano 2014. O alumno do colexio Nosa Señora do Pilar, de 11 anos de idade, Andrés Moreda Hermida, foi o elixido para representar ao Concello na súa felicitación institucional para as vindeiras festas de Nadal. O xurado seleccionou a súa postal de entre un total de 648 traballos presentados despois de outorgar dous premios en cada unha das tres categorías diferentes (infantil A, Infantil B e xuvenil).

Na primeira categoría infantil, na que participaban nenos de ata 6 anos, a gañadora foi Alice Freixo Forés, de 6 anos. O segundo posto foi para o cativo de 3 anos Brais Sixto Blanco. Paralelamente, nesta categoría o xurado decidiu entregar ademais dous accésits: un a Guillermo Lestegás López, de 3 anos, e outro a Alberto Núñez Lago, de 6 anos. Na segunda categoría infantil, de 7 a 10 anos, os gañadores foron: Mireya López Basanta (9 anos), en primeiro lugar, e Miguel Fernández Cortés (10 anos), en segundo posto. E finalmente, na categoría xuvenil, de 11 a 16 anos, alzáronse como triunfadores Andrés Moreda Hermida (11 anos), no primeiro lugar, e María Femenías Hermida (13 anos), no segundo. De entre todos eles, o xurado tivo que escoller unha soa postal para representar ao Concello na súa felicitación das festas de Nadal. Unha elección que rematou finalmente coa obra de Andrés Moreda Hermida alzándose coma gañadora e o premio especial ao colexio gañador foi para o centro Nosa Señora do Pilar.

Ángel Paleo Soto, concelleiro de Cultura de Foz, mostrouse moi satisfeito coa alta participación obtida na XIII edición deste concurso de postais de Nadal, que é o máis antigo da comarca, e agradeceu o interese mostrado polos diferentes colexios da vila. Ademais, dende a Biblioteca Pública Municipal, organizadora do concurso, agradecen o esforzo realizado por tódolos participantes, e destacan a gran calidade observada nos traballos presentados.