O BNG de Foz propón uns orzamentos participativos que creen emprego e con medidas impositivas e de contratación igualitarias

Foz, a 20 de decembro de 2014.- O BNG de Foz exporá no pleno do luns unha serie de propostas para que se inclúan nos Orzamentos Municipais de 2015. Como di o voceiro municipal, Xan Carlos González Basanta “son propostas que o BNG sempre puxo enriba da mesa e que mellorarían tanto as contas municipais como o benestar do pobo”.
O BNG ve a necesidade de sacar adiante uns orzamentos para o 2015 pois levamos dous anos con eles prorrogados e xa non se adaptan á realidade socioeconómica de Foz. Para isto, é tan importante ou máis elaborar unhas bases de execución serias e responsables como presentar unha partidas realistas e cribles que teñan en contas os aspectos máis sociais.
Neste sentido, o BNG ten claro que as bases de execución deben incluír algunhas medidas imprescindibles para un funcionamento máis transparente e axeitado. En primeiro lugar, é necesario o cumprimento da lei no que respecta á certificación da existencia de crédito antes de realizar o gasto a través dun procedemento –proposta de gasto- que quede reflectido nas propias bases. Tamén artellar algún procedemento nas bases que garantan na adxudicación de contratos menores os principios de publicidade, concorrencia e obxectividade. Outras medidas a contemplar nas bases de execución serían a municipalización dos servizos privatizados e que caducaron co que se crearía emprego municipal, o cumprimento dos criterios aprobados polo Pleno no reparto da produtividade ou cubrir as vacantes producidas en canto a persoal. Sería un avance importante para democracia municipal elaborar unhas bases de participación cidadá que entre outras cousas deran participación aos veciños na elaboración dos orzamentos anuais do Concello.
Respecto ás partidas de ingresos, o BNG está convencido de que o Concello ten que elaborar as partidas en base o recadado –criterio de caixa- e non aos dereitos recoñecidos para ter uns orzamentos máis axustados á realidade. Tamén serían imprescindibles medidas como aplicar a vía executiva ata as últimas consecuencias na recadación, eliminar os dereitos de dubidoso cobro a través dun expediente de depuración (os dereitos pendentes de cobro eran de 1.839.282 euros a 31 de decembro de 2014) e establecer novos impostos directos como a imposición do IBI ás propiedades da Igrexa Católica que non teñan exención legal. Como contraposición, o BNG propón incrementar as bonificacións e as exencións en taxas e impostos para as persoas e familias máis desfavorecidas economicamente e a aplicación da redución do gravame no IBI aprobado polo Pleno.
Respecto ás partidas de gastos, para o BNG é fundamental seguir o principio de non gastar máis do que se ingresa e cumprir a lei no que respecta ao prazo de pago a provedores.

O BNG defende así mesmo a non contratación de empresas externas ao Concello para realizar traballos que deben e poden realizar o persoal do Concello. O PP pretende gastar 33.600 € nunha empresa xardinería. Tamén estamos a favor de cumprir o pactado cos traballadores/as do Concello respecto á suba salarial aprobada na RPT. Despois do debate social en canto ao soldos dos políticos o BNG proporá unha redución dun 10% do salario do alcalde que agora está en 4.064 euros ao mes brutos e das asignacións a grupos municipais e a concelleiros. Desta forma, estes cartos poderían ir a partidas sociais ou de creación de emprego. Tamén, o BNG pedirá que os cartos dedicados a inversións se redistribúan equitativamente entre todas as parroquias do concello.

O BNG, coma fixo sempre, vai a seguir defendendo uns orzamentos baseados nas persoas, máis sociais que nunca, transparentes nas contratacións, empeñados na creación de emprego estable e de calidade, realistas nas contas, responsables coa súa execución, que graven máis aos poderosos e que defendan a autonomía municipal na toma de decisións.