O portavoz municipal do BNG de Cervo non asistirá ó convite para a inauguración do gasoducto da Mariña

Cervo, 7 de febrero de 2015. O BNG anunciou que o portavoz municipal convidado ao acto, non asistirá á inauguración do gasoducto da Mariña este próximo luns. A formación nacionalista argumenta que ao marxe de valorar positivamente esta infraestrutura, a forma de actuar coa veciñanza expropiada foi avasalladora xa que a esta altura coa obra executada, nin sequera foron resoltas as alegacións e non se coñece canto van percibir polos terreos expropiados nin cando. Ademais critica a forma de actuar da empresa adxudicataria da obra que entrou unas fincas arrasando sen o mais mínimo coidado, desfixo patrimonio propio do concello como sucedeu cunha canle dun muiño no Río Covo, rebentou tubaxes de saneamento sen informar ao concello e non recuperou totalmente as zonas afectadas.

Para o portavoz municipal nacionalista, Xoán Antón Estúa, “o presidente Feijoo, o alcalde de Cervo e demais cargos políticos asistentes a este acto de inauguración ademais de facerse fotos de inauguración deberan lembrarse da xente que ten pendentes de resolver alegacións presentadas polos terreos expropiados e nin saben nin canto, nin cando lles van pagar”.

A formación nacionalista en Cervo “valora positivamente a chegada do gasoducto a Cervo e á comarca porque supón un avance na prestación de servizos á veciñanza que poderá acceder ao gas natural e tamén e porque mellora a competitividade na produción de Alcoa, outra cousa é o modo de proceder na expropiación e execución da obra”.

Para o BNG o fin non xustifica os medios, parece que aos dirixentes do Partido Popular encabezados polo presidente da Xunta, úrxelles vender algo en positivo na comarca en época preelectoral pero obvian os problemas das persoas afectadas.