AGEe denuncia que “o Goberno español non respecta o Art. n°17 da Política Pesqueira Común no reparto de cotas pesqueiras”

Bruxelas, 17 Marzal 2015. O Comisario europeo de Medio Ambiente, Asuntos Marítimos e Pesca, o maltés Karmenu Vella, vén de respostar en nome da Comisión Europea (CE) a unha pregunta[1] rexistrada pola deputada de Alternativa Galega de Esquerda en Europa (AGEe), Lídia Senra, en relación á posíbel redistribución das cotas pesqueiras en aras dunha ampliación significativa da marxe de capturas para os barcos galegos.

Así, tendo en conta que na súa resposta o propio Vella afirma que a Comisión Europea recoñece para Galiza “a importancia do seu sector pesqueiro para a economía local”, e dado que o citado Artigo 17 sinala que un dos criterios empregados para realizar o reparto de cotas é precisamente “a contribución á economía local”, dende AGEe entendemos que o Goberno español non cumpre cas obrigas recollidas no Art.17 da Política Pesqueira Común (PPC) con respecto aos criterios a aplicar para o reparto da cota dentro do Estado, xa que non está a ter en conta a economía local nin os niveis reais de pesca na Galiza, tal e como se vén poñendo de manifesto nas mobilizacións que está levando adiante o sector.

Aliás, en relación á afirmación da CE de que a información proporcionada polo Estado español non lle permite “inferir” que os criterios que aplica para repartir as cotas sexan contrarios ao Art.17, Senra denunciou que “a información que ten a Comisión por parte do Estado non se axusta á realidade, posto que neste momento na Galiza a aplicación das cotas pesqueiras ameaza con destruír milleiros de postos de traballo, e con eles a economía local”. A fin de clarificar que tipo de información está a recibir a CE, a eurodeputada de AGEe instouna a “contactar directamente co sector, que xusto nestes días está mobilizándose en demanda do aumento de cota”.

Por outra banda, a eurodeputada de AGEe sinalou tamén que “non estamos dacordo en que a cota asignada ao Estado español garanta a estabilidade relativa das actividades pesqueiras”, polo que “é necesario revisala para que as cotas estatais sexan xustas e resposten á realidade pesqueira da Galiza”, demandou.

Tanto dende o Parlamento Europeo como Galego, Alternativa Galega de Esquerda ten rexistrado varias iniciativas en demanda dunha ampliación da cota pesqueira para Galiza. Aliás, Lídia Senra e o deputado Juan Fajardo amosaron o seu total apoio ao sector do cerco participando na mobilización convocada o pasado sábado diante da residencia oficial do Presidente da Xunta de Galiza en Monte Pío.

“O impacto no emprego e na economía galega é o suficientemente serio como para que a ministra faga un oco na axenda para tratar este tema”, reivindicou Senra, “primeiramente co sector, pero tamén cas deputadas e deputados galegos que lle temos manifestado interese en tratar este tema directamente con ela”.

Dende Alternativa Galega de Esquerda en Europa (AGEe), instamos á Xunta de Galicia a que cumpra ca súa responsabilidade e defenda con contundencia os intereses do sector pesqueiro galego, tanto en Madrid como en Bruxelas.