ALFOZ. O PP perde a maioría absoluta e VIA irrompe na corporación municipal con 3 concelleiros
Coa perda de poboación e a diminución no número de representantes na Corporación Municipal de Alfoz dende os 11 ós 9; Emilio Lousas perde a maioría absoluta co descenso en 2 concelleiros con respecto a 2011.
O PSOE mantén os seus 3 representantes, mentres que Veciños Independentes de Alfoz (VIA) con Xabier Pardiñas á cabeza logra entrar no Pleno con 3 edís.
A PONTENOVA. O alcalde socialista Darío Campos aumenta os seus apoios
O PSdeG-PSOE aumenta a súa vitoria logrando 7 concelleiros fronte os 6 da pasada lexislatura. O concelleiro gañado pérdeo o PP que cae ata os 3 representantes na corporación municipal da Pontenova que volve contar cunha acta cionalista que ocupará Mónica Rancaño.
BARREIROS. O Partido Popular mantén a maioría en Barreiros onde Fuente Parga volverá encabezar o goberno local
A pesar de que Fuente Parga consegue revalidar a maioría absoluta que lle permite gobernar ó PP en solitario, a candidatura perde forza e logra 6 concelleiros fronte ós 7 da pasada lexislatura. Pola contra, o BNG – AA de Ana Ermida sube dos 2 ós 4 representantes na corporación barreirense; mentres que os socialistas perden un concelleiro e quedan cun só representante no Pleno do Concello.
BURELA. O ex rexedor socialista Alfredo Llano recupera a alcaldía con maioría absoluta
Mentres que o PSdeG- PSOE logra 7 concelleiros que supoñen a maioría absoluta en Burela, o PP perde tres concelleiros con respecto a 2011 e queda con 4 fronte ós 7 da pasada lexislatura.
O BNG-AA aumenta a súa representación na corporación logrando 2 concelleiros fronte á única acta da pasada lexislatura. Os nacionalistas quedaron a 18 votos de conseguir un edil máis.
Compromiso x Galicia – Concellos Transparentes e Ciudadanos non acadan representación.
CERVO. Alfonso Villares repite maioría absoluta para o PP en Cervo
O Partido Popular conserva as 7 actas no Concello de Cervo permitindo a Villares manterse na alcaldía outros 4 anos. En fronte, os partidos da oposición repiten representantes no Pleno (3 para o PSdeG-PSOE e 1 para o BNG-AA); aínda que con novas caras.
FOZ. Incerto panorama en Foz con vitoria para o PP sen maioría absoluta
Javier Jorge Castiñeira repite apoios e acada 5 edís que non son suficientes para gobernar con maioría absoluta.
Pola súa banda, o PSdeG-PSOE cae dos 4 ós 3 representantes no Pleno da Corporación e o BNG-AA aumenta a súa representación dende 1 ata os 2 edís.
Foz Plataforma de Futuro -integrado por ex socialistas- irrompe con 3 edís empatando cos socialistas.
Ante este panorama, o goberno municipal de Foz podería continuar como ata agora nas mans de Castiñeira sen maioría.
LOURENZÁ. O PSOE adianta ó PP en Lourenzá que perde un edil e a maioría
Rocío López converterase en alcaldesa de Lourenzá tras lograr a maioría. Os socialistas obtiveron 6 edís fronte ós 5 da candidatura popular encabezada, por primeira vez, pola actual rexedora, Enma Álvarez.
O BNG-AA perde o seu único representante na corporación municipal obtido nas anteriores eleccións.
MONDOÑEDO. Elena Candia accede á alcaldía de Mondoñedo tras lograr a maioría absoluta
Os populares lograron a vitoria nas urnas igual que nas pasadas eleccións; aínda que, nesta ocasión, con maioría absoluta.
A candidatura de Elena Candia alcanza os 6 representantes arrebatando un edil ós nacionalistas que caen dos 4 ós 3. O PSdG-PSOE, liderado por Esperanza González, mantén o número de representantes na corporación local que acadara a formación con Modesto Díaz na pasada lexislatura: 2.
OUROL. Os socialistas gañan en Ourol
O PSOE obtén a vitoria nos comicios municipais deste 24 de maio. Con 4 concelleiros foi a forza máis votada, por detrás do PP que obten 3 e o CxG-CCTT, 2.
Os populares con Marcial Sanjurjo á cabeza perden apoios a favor de Compromiso por Galicia – Concellos Transparentes.
O VALADOURO. As urnas apoian o traballo do socialista Edmundo Maseda á fronte da alcaldía
O PSdeG-PSOE obtivo máis votos que o PP nos comicios municipais deste domingo 24 de maio, aínda que ambos conseguen 5 concelleiros cada un. O PP mantén o número de representantes; mentres que o PSOE sube dos 3 ós 5 ante a falta de concorrencia de UDIVAL.
O BNG-AA mantén a acta de Eduardo Chao.
O VICEDO. Jesús José Novo mantense na alcaldía do Vicedo
O rexedor popular do Vicedo logra de novo ampla maioría absoluta; aínda que perde un edil a favor do BNG-AA. Deste xeito, a formación nacionalista alcanza os 2 representantes no Concello fronte ós 6 dos populares.
O PSdeG-PSOE conserva o seu edil, Vicente César Parapar.
RIBADEO. O nacionalista Fernando Suárez Barcia aumenta a súa maioría
Tendo en conta o aumento da poboación no municipio, e polo tanto, o número de representantes no Pleno do Concello, a candidatura do BNG-AA en Ribadeo logra 10 concelleiros: 3 máis que nas eleccións municipais do 2007.
O PP mantense con 4 edís; mentres que o PSdeG-PSOE sube ata os 2 (fronte a un único representante na pasada lexislatura).
Ciudadanos entra na Corporación Municipal cun edil.
RIOTORTO. O popular Clemente Iglesias accede á alcaldía
Á espera da decisión da xunta electoral de Mondoñedo ante a impugnación do voto por correo por parte dos nacionalistas, o PP logra a maioría absoluta con 5 edís en Riotorto onde accederá á alcaldía Clemente Iglesias.
O BNG-AA, que ata o momento gobernaba en Riotorto co apoio do PSdeG-PSOE, quedou a 12 votos de conseguir un cuarto concelleiro. Perde, polo tanto, 1 edil a favor do PP e queda con 3 representantes no Pleno Municipal que non son suficientes para repetir pacto cos socialistas que obteñen 1 representante igual que nos pasados comicios.
TRABADA. Mayra García, nova alcaldesa de Trabada
O PSdeG-PSOE logra a vitoria nun feudo tradicional popular. Deste xeito, o PP de Yanes Ginzo perde a maioría obtendo só 4 concelleiros (fronte ós 6 dos pasados comicios) e deixa a alcaldía de Trabada nas mans da coordinadora comarcal socialista que encabezaba a candidatura que logra 5 representantes no ente local.
O BNG – Asembleas Abertas perde o edil logrado nos anteriores comicios.
VIVEIRO. María Loureiro vence nas urnas
A actual alcaldesa de Viveiro, tras o falecemento de Melchor Roel, logra a vitoria nestes comicios aumentando dende o 6 edís ós 8 a representación socialista na corporación de Viveiro.
O Partido Popular perde un novo edil caendo dende os 6 ata os 5; mentres que o BNG-AA se mantén con 3 representantes. Son Viveiro -antiga EU- logra recuperar o tradicional edil da esquerda.
XOVE. Demetrio Salgueiro continúa na alcaldía de Xove co respaldo da maioría d@s votantes
O PP logra 7 edís en Xove onde Demetrio Salgueiro repetirá á fronte da alcaldía cunha ampla maioría absoluta, a pesar de perde unha acta a favor do BNG-Asembleas Abertas que suma apoios e logra dobrar o seu número de concelleiros na corporación. De feito, pasa dos 2 ós 4 tras arrebatar tamén outro edil ós socialistas que perden representación na corporación xovense.
O campo de fútbol do Cascabeiro acolleu o pasado sábado a III Festa do Mexillón, organizada polo Celta Barreiros. Centos de persoas achegáronse a gozar dunha tarde de gastronomía e de música. En total foron servidas 670 racións entre veciñanza e visitantes, que saborearon mexillóns e lacón. Os organizadores amosasen satisfeitos da acollida: “estamos contentos pola boa resposta dos asistentes”. E tiveron palabras de agradecemento “para os Concellos de Barreiros e de Foz pola boa colaboración”.
Familias, amizades e persoas de todas as idades viviron cada xogada e cada aplauso, evidenciando que o fútbol é tamén unha oportunidade para fortalecer a convivencia e a unión da veciñanza. O municipio felicitou á Selección Española polo seu título mundial, un éxito histórico que fixo vibrar a toda a comunidade.
O acto está organizado pola Asociación de Irmandade Locudy, nunha proposta cultural que pon o foco na relación entre Galicia e Bretaña a través da figura de Castelao.
Era o único ocupante do vehículo. O 112 Galicia tivo coñecemento do accidente uns minutos despois das 10:00 horas. Segundo indicou un particular, un coche caera por un desnivel duns 20 metros no quilómetro 2 da LU-P-6104. Desde a Sala de Operacións do 112 Galicia informouse ao Servizo de Urxencias Sanitarias de Galicia-061, aos Bombeiros de Barreiros, á Garda Civil de Tráfico e á Agrupación de Voluntarios de Protección Civil de Trabada. Unha vez no punto, os servizos de emerxencias indicaron que había unha persoa falecida, único ocupante do vehículo, sen que nada se puidera facer por salvarlle a vida.
A cita, consolidada como un referente do verán cultural no municipio, reuniu na Praza dos Campos á formación anfitriona do encontro, a Agrupación La Sidrina, de Lugones (Asturias) e o Grupo Folklórico Estampas de México. A programación continuou o sábado coa celebración do Festival Folklórico Infantil. Villares puxo en valor o labor que o grupo Mistura desenvolve durante todo o ano na conservación e difusión do patrimonio cultural galego, así como a importancia de iniciativas coma este festival “para manter vivas as tradicións e dinamizar a vida social e cultural dos nosos concellos”.
A eucaristía, un dos actos centrais das festas patronais de Foz, continuou coa tradicional procesión e coa ofrenda floral en memoria das persoas falecidas no mar. A mandataria provincial formou parte da comitiva xunto a numerosos veciños e veciñas, visitantes, membros da corporación municipal e a pregoeira desta edición, María Nelle Castro Neira, focense moi vinculada ás festas desde a infancia.
As familias, o equipo docente, e o alumnado da Escola Infantil Municipal desfrutaron esta semana dunha xornada de convivencia e aprendizaxe neste parque. Ao longo do día, ademais de visitar a reserva e coñecer de preto numerosas especies animais, compartiron un agradable picnic nas instalacións do parque e tiveron acceso tanto á zona exclusiva da reserva como ao resto do recinto. A xornada rematou cunha actividade moi especial: un pequeno teatro participativo sobre a prevención dos incendios forestais, no que os nenos e nenas aprenderon a importancia de coidar os nosos montes e de evitar condutas que poidan provocar lumes, como abandonar obxectos de vidro na natureza. Un día cheo de experiencias, convivencia e aprendizaxes que reforzan o compromiso coa educación ambiental desde as primeiras idades.
