O vicepresidente da Xunta comunicoulle ao alcalde de Foz que lle outorga un novo vehículo para a Policía Local

Foz, 18 de setembro de 2015.- O vicepresidente da Xunta, Alfonso Rueda, fíxolle saber ao alcalde de Foz, Javier Jorge Castiñeira, que se lle outorgará á Policía Local un novo vehículo. Así o anunciou este venres o rexedor focense, que conta recibir o coche nun prazo de entre 15 ou 20 días.

“Dende a Vicepresidencia da Xunta, concretamente o conselleiro Alfonso Rueda, comunicáronnos ao Concello de Foz que foi outorgado por parte da Xunta de Galicia un novo vehículo policial que no prazo de 15 ou 20 días estará a disposición da nosa Policía Local”, explicou Castiñeira. “Era un requirimento de equipamentos por parte da Xefatura da Policía Local de Foz e chegou a bo porto, porque dende a Xunta tiveron a ben acometer este financiamento dun coche para o noso concello. Ese cambio de vehículo da Policía Local levará a que podamos transformar algún dos actuais coches policiais en vehículos para outros servizos do Concello, para obras ou outro tipo de necesidades tamén demandamos”, dixo o alcalde.

Javier Castiñeira concluíu comentando que “polo tanto estamos contentos e agradecemos o compromiso da Vicepresidencia da Xunta de Galicia, como está tendo durante todos estes anos, co Concello de Foz, neste daso atendendo unha necesidade da nosa Policía Local”, concluíu.