Daniel Alonso, con cifras de categoría sénior na Liga Sub 16 da Tirada de Bolos de Xove

Monte acollía a terceira xornada da XXVII TIRADA DE BOLOS, XVI SUB 16 e VII LIGA FEMININA de Xove o pasado sábado 17 de outubro cunha excelente participación que alcanzaba os 38 inscritos.

Liga Sénior Masculina
Ó final deste longo torneo de 18 tiradas vai primar a regularidade. E, polo momento, está en mans de J. Rafael González, quen grazas á terceira posición acadada mantén o liderato con 25 puntos, seguido de Francisco Pérez e Sócrates Campo, ambos con 20 puntos. Cuarto é Moisés Rodríguez con 18 puntos e quinto, grazas á súa vitoria, Ginés Rodríguez con 13.
Aínda que é pronto para avanzar un propección final de resultados, a tendencia decántase cara un campionato moi discutido, sen un favorito claro. Iso sí, a maioría dos favoritos xa están a ocupar postos de cabeza.

Liga Sénior Feminina
Segunda vitoria consecutiva para Salomé Cardoso que afianza o seu liderado con 5 puntos de vantaxe sobre a actual campioa, Belén Meitín. Nesta categoría xa puntuaron 8 xogadoras distintas, polo que é posible ver un campionato máis aberto no que, ademais das tres favoritas (Salomé Cardoso, Belén Meitín e Carmen Roca), poidamos ter algunha incorporación dalgunha outra xogadora que aumente a emoción da competición.

Liga Sub 16
Nova vitoria, terceira consecutiva, para Daniel Alonso, que volveu a pasar o rodillo na súa categoría onde está a exercer un liderado sen paliativos.

A súa puntuación permitiríalle puntuar na categoría senior; a pesar de que, nesta, categoría non lle conta a liña do 20. Por detrás, o único que que lle aguanta o tirón é Miguel López, que fixo unha excelente tirada para o que é a súa categoría.

A vindeira tirada terá lugar no CENTRO SOCIAL DO CRUCEIRO, O VINDEIRO SÁBADO, 24 DE OUTUBRO DE 2015; a pesar que estaba prevista no Campo Municipal de Fútbol de Xove, pero este acolle un partido de fútbol nesa data. Así, a tirada de Xove pasará a celebrarse o sábado 31 de outubro.