Photocall “Un libro… un soño” para conmemorar o Día da Biblioteca en Viveiro

O 24 de outubro de 2015 celébrase o Día Mundial das Bibliotecas e o Concello de Viveiro quere sumarse a esta celebración organizando un evento orixinal co que se pretende motivar aos usuarios da Biblioteca Municipal de Viveiro para que se acheguen ás súas instalación nesta data tan especial, agardando, así mesmo, que aquelas persoas que non son usuarias deste servizo visiten a biblioteca e se animen a asociarse e disfrutar das súas posibilidades.

A actividade prevista consiste na instalación dun photocall, co lema “Un libro… un soño”, que estará operativo o venres 23 de outubro, de 18.00 a 20.00 horas, e o sábado 24, de 12.00 a 14.00 horas, no que se poderán fotografiar todos aqueles que o desexen. Estas fotografías serán mostradas nunha exposición que se organizará, nas vindeiras semanas, na sala sita na planta baixa da biblioteca municipal; tras o peche da exposición referida, os participantes poderán recoller a súa fotografía, que quedará como recordo dunha actividade divertida coa que este concello pretende fomentar a lectura e reivindicar a importancia das bibliotecas, entendidas como lugar de encontro para os lectores de distintas xeracións e, tamén, como fonte de cultura, coñecemento e formación. “As bibliotecas son un recurso cultural fundamental e a súa labor sociocultural é imprescindible. Por iso, animamos a todos os veciños, sexan ou non usuarios habituais, a que se acheguen á Biblioteca Municipal de Viveiro nos horarios referidos e mostren o seu apoio á lectura e a este servizo fotografiándose no photocall deseñado para esta conmemoración”.

Finalmente, a alcaldesa quere aproveitar esta celebración para “agradecer publicamente as xestións realizadas polo anterior alcalde, Melchor Roel, para rehabilitar a antiga Casa do Concello e convertila nunha biblioteca moderna, céntrica e funcional, unha gran biblioteca, propia dunha gran cidade, que debemos valorar e disfrutar”.