A Asociación de Amas de Casa e Consumidores Baos de Lourenzá súmase á repulsa da violencia de xénero

Lourenzá, a 12 de Novembro do 2016.- A presidenta da Asociación Amas de Casa e Consumidores Baos de Lourenzá, Emma Álvarez, informou que dende a Asociación que preside se suman aos actos de repulsa contra a Violencia de Xénero, especialmente a exercida contra as mulleres.

Dende a Asociación e en colaboración con Mulleres en Igualdade de Burela e a Secretaría Xeral da Igualdade organizamos unhas Xornadas contra a Violencia de Xénero que consistirán nunha mesa redonda na que se abordará esta problemática. Terá lugar o vindeiro mércores 25 de Novembro no Salón de Actos da Casa da Cultura do Concello de Lourenzá as 20.00 horas.

A violencia que, nas súas distintas formas, física ou psíquica, se exerce contra as mulleres constitúe a máis clara manifestación das desigualdades que persisten entre mulleres e homes, constituíndo un atentado contra o dereito á vida, á seguridade e á liberdade, á dignidade e á integridade física e psíquica das víctimas e, polo tanto, un obstáculo para o desenvolvemento dunha sociedade máis xusta e igualitaria. Partindo desta base, a experta en violencia de xénero Alba Cao de Mulleres en Igualdade falaranos de como actuar en caso de violencia de xénero para seguidamente escoitar o testimonio dunha víctima desta lacra en primeira persoa, trátase de Ana Uría de Mulleres en Igualdade de Burela.

E posto que as situacións de violencia de xénero requiren unha resposta coordinada, eficaz e interdisciplinar por parte das distintas administracións, cerrará a mesa redonda Susana López Abella, a Secretaria Xeral de Igualdade da Xunta de Galicia que poñerá enriba da mesa as medidas de actuación dende a Administración ante un caso de violencia de xénero.

Remataremos o acto logo dun coloquio entre os e as asistentes, coa representación da coreografía “Abre tus ojos” interpretada por mulleres víctimas de violencia de xénero e voluntarias de Mulleres en Igualdade.
As persoas que acudan a esta cita poderán ver a exposición “Tod@s somos 016” do Canteiro – Artesán do Barrio dos Muiños en Mondoñedo Fernándo Vilariño.

As socias da Asociación repartirán lazos morados entre os asistentes que lucirán durante todo o acto como sinal visible da necesidade de seguir avanzando na loita contra a Violencia de xénero e mostra do compromiso da Asociación co obxectivo de alcanzar unha sociedade libre de violencia na que as mulleres gocen da dignidade e os dereitos que lles son inherentes, como corresponde a unha sociedade libre e democrática.