A Agrupación Socialista de Ribadeo celebrou, o pasado sábado 5, unhas charlas sobre a sexualidade da muller para dar comezo a un ciclo de charlas de interese xeral conmemorando o Día Internacional da Muller. Estas conferencias foron impartidas polo Doutor Cristóbal Rodríguez Garfia, especialista en Xinecología e Obstetricia con clínica en Burela.
Comezou por achegar ás máis novas toda a información posible sobre saúde sexual e métodos anticonceptivos, e tamén sobre fisioloxía do aparello reprodutor feminino, rompendo mitos e eliminando tabús. Falou de saúde reprodutiva, de como a sexualidade e o control ou aproximación pouco acertada a ela condiciona a saúde e as relacións humanas, e de como as mulleres temos que coñecernos e reapropiarnos do noso desexo e esquecer os prexuízos que nos impón a sociedade.
Na segunda parte, orientada a un público de máis idade, e quizás menos cohibido xa que a asistencia foi maior, tratáronse temas tan importantes como o dereito para decidir sobre a nosa sexualidade e a nosa reprodución, as etapas da vida, e a influencia da idade á hora de abordar a sexualidade. De novo romperon mitos, como o perigo do sexo no embarazo ou que na madurez sexa innecesario ou desaconsellable practicalo.
Desde o punto de vista médico, o Doutor Garfia puntualizou diferentes problemas relacionados coa vida da muller: dores premenstruais, osteoporoses, menopausa, depresión, infeccións… E recomendou unha revisión anual porque calquera problema, atopado a tempo, é máis fácil de controlar e solucionar, como, por exemplo, o cancro do pescozo uterino, detectable mesmo 10 anos antes de que se desenvolva con tan só unha citoloxía (aquí remarcou a importancia das institucións públicas e as políticas de sanidade, xa que hai controis básicos e económicos que non se efectúan e que recortarían custos ao axudar a evitar problemas futuros máis graves).
Como se trataba dun día para reclamar a igualdade, déronse datos tan importantes como a diferenza de salario entre homes e mulleres co mesmo posto de traballo, os problemas coa conciliación (a inexistencia da mesma), e o acoso e a violencia de xénero, lembrando que o máis importante é a educación: educar en igualdade.
Iso é o que tentamos con este tipo de conferencias: facer chegar á sociedade liberdade, información e respecto por cada individuo, sexa do sexo que sexa.
I Certame Literario “Día da Muller”
E, falando de igualdade, a agrupación socialista de Ribadeo convocou o I Certame Literario “Día da muller”, aberto a nacid@s ou residentes no concello de Ribadeo e aquel@s que, sen reunir a condición anterior, cursen estudos de Educación Primaria, E.S.O., Bacharelato e ciclos formativos en calquera centro da comarca.
Pódense consultar as bases na súa páxina web (na pestana do certame), ou no facebook da Agrupación. O fallo do concurso farase público antes da entrega de premios que se celebrará o 3 de abril de 2016.
Os traballos dividiranse nas categorías INFANTIL ou XUVENIL (sinalando as
CATEGORÍAS A, B ou C) e deberá ser presentados por correo postal ou persoalmente en Agrupación Socialista de Ribadeo, sita en Rúa Viejo Pancho nº16 de Ribadeo (Lugo) os mércores de 10.30-13.00 e de 17.00-
19.30 horas.
O prazo de presentación dos traballos finalizará o 23 de marzo de 2016 ás 19.30 horas.
Dez minutos antes das 21:30 horas do xoves, o 112 Galicia foi informado polo persoal de Adif dun tren detido no medio dun túnel en Mogor, Mañón, debido a unha chapa metálica no medio da vía. Así, aínda que as doce persoas que viaxaban a bordo estaban ilesas, precisaban medios de rescate para baixalas do convoi e desprazalas ata o apeadeiro máis próximo. Nestas tarefas colaboraron a Garda Civil, os Bombeiros do Eume, o GES de Ortigueira e os voluntarios de Protección Civil de Mañón. Finalmente, as persoas foron rescatadas e evacuadas a outro tren, que as levou ata o apeadeiro sen maiores complicacións. Desde alí, continuaron a súa viaxe en taxi.
Competirán durante tres días xunto a outras dezaseis escolas de todo o mundo, elaborando catro propostas de pizza: Polbo á galega, con polbo galego, queixo San Simón e allada picante; Bosque galego, con crema de castañas e mel picante; Terra meiga, con zorza picante; e Rapadoira, con setas, queixo azul e pera. As estudantes viaxan acompañadas pola súa profesora, Conchi Carreiras, coa que levan tempo preparando as receitas. Esta é a terceira participación do IES de Foz neste certame, no que xa acadaron un segundo posto en edicións anteriores. A actividade forma parte do programa Erasmus+ da FP, financiado pola Unión Europea, que facilita a participación do alumnado en competicións de habilidades profesionais por toda Europa.
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo.
O sindicato denuncia a decisión unilateral da empresa de retirar días de descanso e implantar quendas que dificultan a conciliación. As concentracións serán nos centros de traballo de Foz (Uxío Novoneira s/n) e Ribadeo (Avda. Galicia 27). Lémbrase que non é unha folga e apélase á solidariedade da plantilla para defender as condicións laborais conquistadas.
Ás 15:15 horas deste martes, un particular solicitou asistencia sanitaria tras a caída dun raio no lugar de Castro de Igrexa (Cazás, Xermade). Varias persoas sentiron os efectos da descarga eléctrica e unha delas quedou atolada. Tras dar aviso ao Servizo de Urxencias Sanitarias de Galicia-061, Garda Civil e Protección Civil, a persoa afectada foi evacuada consciente ao Hospital Universitario Lucus Augusti.
A exposición, instalada no Centro Comarcal Pazo de San Tomé, invita a observar con calma, descubrir historias e poñer en valor un patrimonio vivo que forma parte da nosa identidade. Unha maneira diferente de achegarnos ao mundo rural que tanto significa para As San Lucas.
Co sol ocultándose e a lúa asomando entre as torres de Donlebún, o músico e divulgador reivindicou o poder evocador e transformador do bravú fronte á morriña paralizante. Na sala de lectura da biblioteca, Souto explicou a evolución do rock bravú no imaxinario galego, evocando as músicas populares que acompañaron durante décadas os remolques dos pascualiños e os labores comunitarios, e lembrando a vitalidade de grupos como Skornabois, Diplomáticos de Monte Alto, Xenreira, Zënzar, Pinto de Herbón ou os Rastreiros. A boa lembranza da súa anterior visita levou ao artista a pechar a velada interpretando o “Himno de Ribadeo”, composto por Arturo Mogo, nun final cheo de afecto pola vila e pola súa identidade cultural.
