O alcalde de Foz fai un balance moi positivo da Semana Santa con moita afluencia de público nos actos litúrxicos e de lecer en xeral

Foz, 28 de marzo de 2016.- O alcalde focense, Javier Jorge Castiñeira, fai un balance moi positivo da tempada de Semana Santa, que contou con gran afluencia de xente tanto nos actos litúrxicos como na Semana da Música ou na Ruta das Tapas.

“Desde o Concello de Foz facemos unha valoración moi positiva sobre todo na afluencia de visitantes no noso concello, que se está consolidando como un destino turístico de Semana Santa. Practicamente tódolos actos que se fixeron arredor da Semana Santa, tanto litúrxicos como os da Semana da Música ou a Ruta das Tapas, organizada pola ACIA de Foz, en todos eles houbo éxito de participación, de visitantes e de persoas que xa son practicamente do concello, xente de segunda residencia que decide visitarnos tódolos anos, a verdade é que a pesar do mal tempo podemos estar moi contentos de como estivo o pobo”, manifestou Javier Castiñeira.

Ademais o rexedor focense subliña que “o balance é moi bo e a hostalería en liñas xerais fai tamén un balance óptimo do que foi comercialmente a Semana Santa e isto augúranos un verán en positivo. Quédannos agora uns meses para ir preparando a época estival, pero sen dúbida algunha a verdade é que promete posto que, sen ter un tempo especialmente bo, a ocupación foi moi boa. A igrexa de San Martiño estivo a tope de visitas, os paseos tamén e en xeral o pobo estivo moi ocupado. Polo tanto o balance é moi bo para todos e esperamos que siga así este ano”.