Foz, 8 de maio de 2016. A Asociación de Comerciantes, Industriais e Autónomos de Foz celebraba este sábado a súa cena anual, que serviu para conmemorar o 28 aniversario da creación da Acia. No acto tamén se entregaron os premios aos gañadores da XIII Ruta das Tapas, que tivo lugar a pasada Semana Santa.
A tapa gañadora foi “O mar de Foz”, de Fraggle Rock (os seus responsables non puideron acudir á recollida do premio por motivos laborais); o segundo premio recibírono os responsables de Xoyma e o terceiro premio do xurado recaeu en Cafetería Pastería Anduriña. A súa tapa tamén foi a elixida como a mellor presentada por parte do público, é dicir foi a que conseguiu máis me gustas a través do facebook de Acia/CCA de Foz. Os encargados de facer entrega das estatuíñas e dos diplomas acreditativos foron o alcalde de Foz, Javier Castiñeira; o vicepresidente de Acia/CCA, José Ginzo; e o presidente da asociación, José Carlos Paleo.
O rexedor destacou o apoio do presidente da Acia focense para levar adiante iniciativas en beneficio do pobo e pola súa banda José Carlos Paleo agradeceu a asistencia do alcalde así como a colaboración do Concello coa Asociación de Comerciantes, Industriais e Autónomos de Foz.
A cena anual de Acia/CCA de Foz celebrouse no restaurante Tangarte Mariñeiro. A velada estivo animada por un dj.