O Concello de Cervo agradece á Xunta o investimento de 150.000 euros para completar o equipamento do centro de día e residencia de maiores de San Cibrao

Cervo, 12 de maio de 2016.- O Concello de Cervo agradece á Xunta de Galicia o investimento de 150.000 euros para completar o equipamento do centro de día e residencia de maiores de San Cibrao.

O alcalde, Alfonso Villares, manifestou este xoves: “temos que agradecerlle á Xunta de Galicia, e en concreto ao conselleiro de Servizos Sociais, este investimento que nos dá ao Concello de Cervo para completar o equipamento do centro de día e residencia que temos en San Ciprián. É un investimento de 150.000 euros que vén engadirse ao que a Xunta de Galicia xa puxo a disposición de todos os cervenses para este centro de día de día e residencia. En concreto hai que recordar primeiramente o investimento feito, de cerca de 2 millóns de euros, para a súa construción; e despois tamén outro diñeiro destinado a unha parte do mobiliario. Co que hoxe se acaba de aprobar no Consello da Xunta complétase a última fase do equipamento deste centro de día e residencia e así xa estamos en disposición de pensar en poñelo en funcionamento canto antes”.

O rexedor municipal destacou que “é un servizo moi importante para un concello de menos de 5.000 habitantes, que considero fundamental hoxe en día en todos os nosos pobos; e tamén nos máis pequenos porque axuda, en certa maneira, a fixar poboación e a dar unha serie de servizos que son máis fáciles de atopar nos concellos máis grandes. Por iso nós, desde o Concello de Cervo, nos sentimos agradecidos e satisfeitos con este investimento da Xunta de Galicia. Agora temos que tramitar o expediente para a contratación deste mobiliario e despois quedará xa a última etapa, que é dicir como vamos xestionar este servizo. Esta residencia non forma parte do Consorcio Galego de Servizos de Igualdade e Benestar; neste caso é única e exclusivamente do Concello de Cervo e nosoutros evidentemente temos que poñelo a funcionar. É algo que nunca fixemos, pero cos servizos xurídicos do noso Concello xa estamos traballando para definir, a partir de que se complete esta fase de mobiliario, como vamos xestionar este servizo”.