O subdelegado do Goberno presidiu o acto conmemorativo do 172 aniversario da fundación da Garda Civil

Lugo, 25 de maio de 2016- O subdelegado do Goberno en Lugo, Ramón Carballo, defendeu este venres o papel da Garda Civil como garante dos dereitos e liberdades dos cidadáns. Fíxoo durante o acto conmemorativo do 172 aniversario da fundación da Garda Civil, que se celebrou na Comandancia de Lugo.

Á celebración asistiron o xefe da Comandancia da Garda Civil, Miguel Ángel González Arias; o subdelegado de Defensa, Ricardo Jesús Suárez; o xefe da Policía Autonómica, José Ramón Fernández; e o xefe da Policía Local, Manuel Méndez, entre outros.

EVOLUCIÓN EXEMPLAR
O subdelegado do Goberno destacou na súa intervención o “carácter profesional” da Garda Civil que, nos seus 172 anos de historia, “non cesou na encomenda de velar pola paz e a seguridade do conxunto dos españois”. Valorou ademais que, manténdose fiel aos seus valores fundacionais, a Garda Civil esfórzase día a día por “dar un maior e mellor servizo aos cidadáns, creando especialidades específicas para levar a cabo as tarefas cada vez máis crecentes e complexas que impoñen os cambios na sociedade española e os novos tipos de delincuencia”.

Neste senso, Ramón Carballo valorou a “evolución exemplar” da Benemérita dado que “o mesmo Corpo que nos seus comezos combatía principalmente aos bandoleiros, atópase agora á vangarda da loita contra a cibercriminalidade e o terrorismo, desenvolve unha encomiable labor nas nosas estradas, vela pola orde nas nosas costas e no mar territorial, está presente nas redes sociais, e mesmo proxecta a súa presenza a escenarios remotos para levar a cabo labores humanitarias”.

Sempre “ao servizo dos españois, por riba de todo”, engadiu, “conseguistes consolidarvos como un corpo imprescindible, que ocupa un lugar propio e exclusivo dentro do sistema de seguridade nacional, e que forma xa parte do noso patrimonio, da marca España”.

O subdelegado aproveitou para agradecer aos axentes das distintas unidades e especialidades da Garda Civil na provincia o seu traballo “continuo, discreto e eficaz” e eloxiu a “actitude cooperadora” que en todo momento amosa co resto de corpos policiais. Estes aspectos, dixo, contribúen a proporcionar “altas cotas de seguridade e liberdade, que ademais de teren unha innegable importancia en sí mesmas, contribúen a crear un ámbito máis favorable para a convivencia, e mesmo para o progreso e a estabilidade económica”.

CONDECORACIÓNS E RECOÑECEMENTOS PÚBLICOS
No transcurso do acto procedeuse á entrega de condecoracións a sete axentes e a dous civís por diferentes méritos. Así, foron condecorados coa Cruz do Mérito da Garda Civil con distintivo blanco: o tenente Manuel Julio Meléndez Navarro (Subsector de Tráfico de Lugo), o sarxento Jesús Sangiao Valiño (posto de Meira), o cabo José Ángel Lima Milego (Servizo Marítimo Provincial), e os gardas civís Luis Andrés Alonso Torrente (Tráfico), Manuel Espiñeira Calvo (Seprona), Santiago Fernández Coto (núcleo de Servizos) e María de los Ángeles Pereira Díaz (posto de Baralla).

De igual xeito, a Garda Civil recoñeceu ao doutor Enrique Vázquez López, coa Cruz de Plata da Garda Civil, e ao vixiante de seguridade Alberto Grandío Grandío, coa Cruz do Mérito da Garda Civil con distintivo blanco.

Procedeuse ademais á entrega de diplomas de agradecemento polos servizos prestados durante a súa carreira profesional a axentes que ao longo do último ano pasaron á situación de reserva: Manuel Sancosmed Sanjurjo, Antonio Fernández Piñeiro, José María Seijido Santalla, Amador Calvo Calvín, Ángel Castro Castro e Francisco Mouriz Arias.