A Escola Municipal de Música de Mondoñedo celebra este venres 3 de xuño o seu concerto de fin de curso baixo o título “Zoco Musical”

Mondoñedo, 1 de xuño de 2016.- Este venres 3 de xuño, ás 8 e media da tarde, a Escola Municipal de Música do Concello de Mondoñedo celebra o seu concerto fin de curso, baixo o nome de “Zoco Musical”. Constará de dúas partes, a primeira delas, será un novo formato de actuación, no que se desenvolverán pequenos concertos nas aulas da escola de Música, semellantes aos microteatros, cun público reducido por aula, onde se poderá interactuar cos alumnos . A idea é ir percorrendo cada aula de forma que seña o máis dinámico posible e cada espectador poderá seguir a orde que queira para presenciar as diversas actuacións. Haberá un cartel na entrada ao recinto coa guía das actuacións indicando a aula onde serán representadas, e á súa vez, haberá un cartel dentro de cada aula coas pezas a interpretar por cada un dos alumnos.

As representacións de aula durarán de 20:30 a 21:00h e nelas participarán as seccións de guitarra, corda, percusión, de vento madeira, de vento metal, e o grupo infantil, na aula de movemento e expresión corporal.
A segunda parte do concerto terá lugar no Auditorio, a partir das 9 da noite, coas actuacións da Banda da Escola e a Sección de Canto acompañada do Coro Mestre Pacheco, pertencente tamén á Escola de Música.

Dende o Concello de Mondoñedo invitamos a mindonienses e mariñáns a asistir a este espectáculo que é novidoso dentro da programación habitual da Escola Municipal de Música de Concello de Mondoñedo e que dun xeito dinámico e áxil, pretende poñer en valor o traballo de todo un curso académico por parte dos alumnos deste centro.