Fernán Vello: “A corrupción da Monarquía ou do Partido Popular permítenos albiscar unha nova época ou a posibilidade dun cambio sociopolítico real. Non vai vir o lobo, porque xa está aquí”

Viveiro, 18 de Xuño- Este sábado pola tarde, ás 20:00h, celebrouse un acto político en Viveiro no Conservatorio Municipal, onde se achegaron arredor de 35 persoas para escoitar aos candidatos e candidatas de En Marea ao Congreso e o Senado para estas elección do 26X.

Nel participou tamén o deputado de AGE Ramón Vázquez, que manifestou que “nestes tempos de febleza democrática hai que lembrar que as consecuencias do neoliberalismo se traducen en pobreza. Seis de cada dez familias chegamos a final de mes con problemas. A dereita política e sociolóxica estránase de que a Marea medre. O que é incomprensible é que non medre máis. A suba de luz e gas, o alugueiro, a hipoteca, o estado das pensións, a emigración, o traballador pobre…esa precariedade é a que chaman saída da crise. En Marea xurde para que os pequenos nos xuntemos, e exerzamos a lexítima defensa dos nosos dereitos fundamentais. Eles defenden privilexios”.

Modesto Renda, candidato ao Senado e concelleiro de Vilalba Aberta, tamén interviu asegurando que: “A defensa da democracia e da soberanía son a mesma cousa. Escollemos representantes para que gobernemos nós e non poderes alleos. En Marea, en pouco máis de 6 meses, fixo un traballo moi importante. En Marea non ten dependecias e estamos orgullosos de tecer alianzas con outras forzas do estado. Houbo quen dixo que o traballo non fora bo ou que por culpa nosa non houbera goberno, o que é falso. Nós defendemos ás clases populares: se somos culpables de algo é de que non haxa un goberno que nos siga agredindo no traballo, nos servizos sociais, na política social, coa Lei Mordaza que ataca os dereitos humanos e as liberdades. Nesta segunda volta non nos deixemos enganar. Abócannos ao capitalismo feudal, ou a marchar”.

Vanessa Somoza, nº2 ao Congreso declarou que: “Demostramos no 15-M que a rúa é nosa. Os defensores das corporación e da banca, aos que as mentiras lles quedan cada vez máis ao descuberto, son falsos demócratas que pisan á maioría social. Estamos xa fartos das políticas criminais. Feijóo chegou a dicir que porque morreran uns cantos enfermos, podendo evitarse, non pasaba nada. Moi cansos da Lei Mordaza, moi cansos de que se pise tamén a liberdade: hai máis de 200 sindicalistas neste país no cárcere por defender os dereitos de todas. Cansas de inxustizas coma a do accidente de Angrois, onde parece que o único culpable foi o maquinista. Queremos un país xusto, ecoloxista, feminista. A Historia cámbiana os pobos”.

José Manuel Pérez Afonso, nº3 ao Congreso apuntou: “Somos o 99% que o pasa mal. Mais eu son optimista. As nosas avoas loitaron porque ninguén tivera que poñer cartos para pagar o médico. Eu non quero que nos volvan a esa realidade. A verdadeira revolución agora é encher o Congreso de dignidade”.

Para rematar, Miguel Anxo Fernán Vello, candidato número 1 ao Congreso dirixiuse á audiencia: “construímos aquí unha marea que convoca a xentes diferentes que apostan pola recuperación da democracia e soberanía. Concibímonos como unidade popular de liberación social que producirá de vez un cambio político en Galiza e no estado, nun momento crucial da nosa historia. O réxime putrefacto non se sostén. A corrupción da Monarquía ou do Partido Popular permítenos albiscar unha nova época ou a posibilidade de cambio sociopolítico real nas condicións estruturais que afectan directamente ás maiorías. Non vai vir o lobo, porque o lobo xa está aquí: a través da pobreza, da desigualdade, dos recurtes de liberdades e dereitos, etc…Iso é o que queremos superar.