O pleno de Cervo apoiou por unanimidade a declaración institucional proposta polo BNG en apoio do mantemento do emprego e o investimento na factoría de alúmina–aluminio en San Cibrao

Cervo, 3 de xuño de 2016.- Na sesión plenaria celebrada na tarde deste xoves, a corporación apoiou por unanimidade a declaración institucional promovida polo BNG en apoio ao cadro de persoal, polo mantemento do emprego e investimentos na factoría de Alúmina – Aluminio en San Cibrao. A formación nacionalista lamentou que non sucedera o mesmo coa proposta de urxencia para crear unha autoridade portuaria propia na Mariña e a apertura do dique norte do peirao de San Cibrao ao tráfico comercial por negarse o PP a debatela.

O PP agora nega o debate sobre a apertura do dique norte de Morás que defendía fai catro anos
Para o BNG ven sendo unha demanda histórica da comarca a posibilidade de uso comercial do dique norte de Morás, sen ningún uso mais alá de servir de abrigo ao peirao competencia da Autoridade Portuaria Ferrol – San Cibrao e cedido en concesión a Alcoa ate ao ano 2023.

Mantendo esta liña, ven presentando en diferentes institucións iniciativas a tal fin, a última nos concellos de Cervo e Xove, que no caso de Cervo chocou, no pleno do pasado mércores, coa negativa do goberno municipal do Partido Popular nin sequera a abrir o debate a pesar de que o propio Partido Popular ten demandado noutras ocasións esta infraestrutura.

Para o portavoz municipal, Luís Bernardo Insua, “estamos outra vez diante da negativa do PP a mirar cara adiante con visión de futuro, sometido ao mandado de non se sabe qué, e freando posibilidades de desenvolvemento futuro da comarca”.

Que o alcalde de Cervo, membro da directiva da actual autoridade portuaria non queira falar do saqueo que se está facendo á Mariña, chama moito a atención sobre as súas prioridades
Chama a atención, que mesmo se negase o debate sobre o punto para a creación dunha Autoridade Portuaria propia para a comarca, incluído na moción, cando é sabido que a práctica totalidade dos mais de tres millóns de euros que ingresa a Autoridade Portuaria Ferrol – San Cibrao pola actividade do peirao mariñao non quedan aquí.

Bernardo Insua, acusou ao alcalde cervense, Alfonso Villares e ao de Xove que por quendas forman parte do Consello de Dirección do ente portuario, de permitir o saqueo á Mariña e especialmente aos concellos que presiden onde está instalado este peirao.

É moi positivo que as corporacións municipais da Mariña pidan garantir o emprego e os investimentos de Alcoa na comarca
O portavoz municipal nacionalista si se parabenizou pola aprobación por unanimidade da declaración institucional presentada polo seu grupo reclamando o apoio da corporación ao cadro de persoal de Alcoa e empresas auxiliares, así como garantías para o mantemento do emprego e investimentos na factoría de Alúmina – Aluminio, á vista das informacións publicadas pola posíbel venda de parte das instalacións a terceiras empresas.