O Presidente da Deputación, Darío Campos Conde, adiantou este mércores a posta en marcha dunhas das catro medidas coas que o Goberno Provincial decidiu iniciar a execución do Orzamento de 2016 para que este teña un primeiro impacto económico na provincia de máis de 1,4 millóns de euros; un impacto dirixido a potenciar as políticas sociais e a economía no conxunto do territorio lugués a través do impulso de actividades no eido do benestar, educación, igualdade, integración, deporte, turismo e cultura.
Campos Conde explicou que este investimento corresponde ao importe das subvencións nominativas das contas provinciais. Son total de 128 axudas. Destas, 90 son para colectivos e entidades sociais sen ánimo de lucro de toda índole na provincia; e 38 para Concellos. “O obxectivo destas subvencións é contribuír ao desenvolvemento da importante labor que realizan na provincia tecido asociativo, entidades sociais e municipios para potenciar as políticas sociais e impulsar a economía”, remarcou.
Políticas Sociais
Dos máis de 1,4 millóns de euros, concretamente 589.000 euros, son para impulsar o benestar, a educación, a igualdade ou a integración. Tal e como se pode constatar na listaxe que se adxunta a esta información, algúns exemplos son as subvencións para Auxilia, Cogami, Raiolas, Síndrome de Down, Aspnais, Alume; así como para a USC ou para os tres conservatorios municipais de música; ademais das axudas para Proxecto Home ou o Secretariado Xitano, entre outras moitas. “En definitiva, o 42% do orzamento total destas subvencións é para impulsar as políticas sociais; e o 58% restante para impulsar a economía a través do deporte, do turismo e da cultura”, explicou o Presidente.
Impulso da económica co deporte, turismo e cultura
A suma das axudas dirixidas a asociacións e clubes deportivos de toda a provincia para o desenvolvemento da súa actividade é de 409.000 euros. Son beneficiarios destas subvencións o Club Baloncesto de Burela, Muralla Rugbi Club, Club Atletismo Lucus, Escola Luguesa de Xadrez ou a Escola Deportiva Lourenzá Baloncesto Femenino, entre outros moitos.
As subvencións para impulsar a economía a través do turismo, é dicir, mediante “a posta en valor de recursos naturais ou de celebracións nos Concellos, que son marca de identidade propia e atraen a moitísimos visitantes”; suman un total de 249.000 euros. Por exemplo, as axudas para a festa das Fachas en Taboada; do Oso de Salcedo na Pobra do Brollón; do Viño de Amandi en Sober; do Porco Celta de Sarria; do Aceite en Quiroga; da Artesanía en Outeiro de Rei; do Queixo e do Pan de Ousá en Friol; do Berberecho en Foz; da Danza da Cervela no Incio; así como para a posta en valor das Covas do Rei Cintolo en Mondoñedo, etc.
Finalmente, as axudas para impulsar a economía a través de actividades culturais ascenden a 168.000 euros. Subvencións para a Asociación de Gaiteiros Galegos, Fundación Manuel María, Premio Otero Pedrayo, proxecto Benito Losada…
Adianto do 80%
Ata o momento, o organismo provincial adiantaba aos beneficiarios desta axudas o 60% do importe total da mesma; polo que recibían o 40% restante, unha vez executada e xustificada a actividade subvencionada. “Este ano, tendo en conta a data na que nos atopamos, así como a situación na que se atopa o conxunto do tecido asociativo e os Concellos; sen dúbida, os que máis ansiaban a aprobación definitiva do orzamento da Deputación; decidimos adiantar, por primeira vez na Deputación de Lugo, o 80% destas axudas. Isto suporá unha inmediata inxección económica na provincia superior ao 1.120.000 euros”, apuntou Campos Conde.
Dende hoxe e durante os próximos 10 días, asociacións, entidades sociais e municipios poden solicitar o anticipo destas 128 subvencións. Dende a Deputación, xa se está a pór en contacto de xeito individual con cada un dos beneficiarios comunicándolles isto, e enviándolles a documentación correspondente que teñen que entregar no Rexistro da Deputación para recibir este adianto.
4 medidas para a execución de 11 millóns de euros
O adianto das 128 subvencións nominativas por valor de 1,4 millóns de euros para o tecido asociativo, entidades sociais e Concellos, é a primeira das catro medidas coas que o Goberno da Deputación decidiu iniciar a execución do Orzamento de 2016, unha vez que este foi aprobado definitivamente polo Pleno e publicado no Boletín Oficial da Provincia o pasado xoves, permitindo, polo tanto, comezar de xeito legal a súa execución. As outras 3 medidas son as seguintes:
2ª medida: posta en marcha das obras municipais de 4,9 millóns de euros do POS. O Presidente avanzou que “xa nos puxemos en contacto cos municipios para que ao longo destas semanas entreguen a memoria dos proxectos que queren levar a cabo”. Deste xeito, o Goberno poderá levar a listaxe das obras ao Pleno de xullo para a súa aprobación e inmediata execución.
3ª medida: concesión das axudas do SAF por valor de 1,5 millóns de euros. Campos Conde avanzou que a Xunta de Goberno deste venres aprobará a listaxe das Axudas ao Fogar para os Concellos.
4ª medida: posta en marcha dun plan de emprego para todos os Concellos de menos de 20.000 habitantes por valor de 3 millóns de euros. Tamén neste caso, sempre que os servizos técnicos provincias poidan facelo, aprobaranse as bases desta programación de emprego en vindeiras Xuntas de Goberno.
Deste xeito, xunto coas axudas de 1,4 millóns de euros, as obras municipais do POS de 4,9 millóns, o SAF de 1,5 millóns de euros e o plan de emprego para os Concellos de 3 millóns de euros, o Goberno busca que, este mes de xullo, o orzamento da Deputación de 2016 teña un impacto económico na provincia de case 11 millóns de euros.
A competición celebrarase entre o 24 e o 27 de setembro en Las Vegas, e Julia Cabarcos emprenderá esta mesma tarde a viaxe cara aos Estados Unidos para afrontar a súa participación na categoría Women's Physique.
O programa inclúe inscricións, concertos, exhibicións, rutas e exposición de vehículos. Con motivo do evento, haberá cambios temporais de tráfico no casco urbano, con prohibicións de circulación e estacionamento en varias rúas e modificacións de sentido. O Concello pide á veciñanza que respecte a sinalización para garantir o correcto desenvolvemento das actividades.
Este luns, 14 de setembro, visitaron Mondoñedo, a Praia das Catedrais e Santa Cruz. A viaxe evocou as lecturas de Cunqueiro e as súas Crónicas do sochantre, nun percorrido que incluíu a catedral mindoniense e o barrio dos Muíños, ademais da emblemática praia de Augas Santas. Pola tarde participaron nunha exhibición de billarda grazas á estimable colaboración dos billardeiros da comarca. O martes partiron de regreso a Loktudi.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A programación arrancará de 13:00 a 15:00 horas cos pinchos de benvida e unha sesión vermú a cargo do DJ Peabody. A continuación, de 15:00 a 17:00 horas, terá lugar a comida na Finca San Antonio, cun menú composto por salpicón de rape e langostinos, codillo con patacas, pan, postre, café, chupito e bebida incluída. Os tickets teñen un prezo de 40 euros e poden adquirirse en O Rincón, Confitería Alianza, Comercial Anjor e Perruquería Oriola; os menores de 5 anos asistirán de balde e os de 6 a 10 anos contan cun desconto do 50 %. Xa a partires das 18.30 horas haberá sesión de música con Toxo Guayaba.
Este luns, 14 de setembro, deu comezo un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
