O PP de Burela asegura que “o acondicionamento do solar municipal de Vista Alegre faino a empresa adxudicataria, non o Concello”

Burela, a 13 de xullo de 2016.- O Grupo Municipal Popular (GMP) do Concello de Burela asegurou este mércores que “o acondicionamento para aparcamentos nas inmediacións do Hospital e de Vista Alegre do terreno propiedade do concello vai ser realizado pola empresa adxudicataria das obras, e non polo propio Concello, como asegura o concelleiro de Obras Fernández Rey. O Concello non vai gastar nin un euro nese acondicionamento”.

Os populares afirman que “no seu momento, o equipo redactor do Plano Director da ampliación do Hospital reuniuse en dúas ocasións co anterior goberno municipal do PP, para buscar solucións provisionais para os aparcamentos e mesmo para o heliporto. Dentro das alternativas, que quedaron reflexadas no propio documento do Plano Director, está ese solar, xunto con outros que están nas inmediacións da zona de caldeiras do centro sanitario e na zona de aparcamento das proximidades. Igualmente, quedara claro que o Concello facía as xestións para a consecución das fincas ou solares que se destinarían provisionalmente a aparcamentos mentres durase a obra, e que o acondicionamento corría a cargo da empresa adxudicataria”.

Polo tanto, aseguran desde o PP, “faise o que estaba programado, é dicir, o Concello xestiona solares ou fincas como aparcamentos, e a empresa adxudicataria acondiciona. Por iso queremos deixar claro que o concelleiro de Obras Ramiro Fernández non di a verdade. É mentira que o Concello acondicione, o Concello só cumpre coa súa función. E este acondiconamento faise agora porque en breve comenzará a ocupación do espazo para realizar as obras e vaise ocupar unha zona considerable do actual aparcamento, non porque o diga o Concello”.

O GMP tamén afirma que “o primeiro paso para ir tendo alternativas ó aparcamento actual mentres duren as obras deuno o PP cando se arranxou o solar da esquina da intersección das rúas do Instituto de Rafael Vior, sendo conscientes de que era un espazo insuficiente”.

Desde o PP “pedímoslle ó goberno municipal que diga a verdade, e que nin minta nin engane ós veciños; que non xogue a sacar rendabilidade á ampliación do Hospital porque nunca por ela apostaron e a día de hoxe aínda seguen sen crer que se vai facer”.