O alcalde de Foz cualifica de incrible a tempada alta deste verán no concello, polos récords de visitantes e de actividades diversas para todos os públicos

Foz, 29 de agosto de 2016. A alcalde de Foz, Javier Jorge Castiñeira, cualifica de incrible a tempada alta deste verán no concello, polos récords de visitantes e de actividades diversas para todos os públicos que houbo.

“É tempo de valoracións porque chegou o remate da tempada alta do verán 2016 e estou seguro de que quedará para o recordo dunha inmensa maioría dos que gozamos no concello de Foz destes meses de xullo e agosto dun verán incrible”, manifestou hoxe o rexedor municipal.

Javier Castiñeira especificou: “incrible primeiro porque tivemos un tempo magnífico, cargado de días estupendos que fixeron lucir a nosa vila como a perla da Mariña, nome polo que é coñecida. Incrible pola cantidade de veciños e persoas que trouxeron récords absolutos de ocupación no noso concello, triplicando a poboación natural de Foz e convivindo con total normalidade. Incrible tamén pola alegría e o nivel de satisfacción de todas as persoas, pola acollida e a receptividade dos nosos veciños e pola colaboración cidadá que, sen dubida, vai mellorando verán a verán. Incrible polo récord de actividades que colmataron un programa lúdico, cultural e festivo sen parangón e que é dificilmente ampliable no noso concello: festivais musicais de toda índole e variedade, como os de Coa nosa fala, os encontros de corais, o Vrao, o Why not here fest, o de música electrónica Tentacle, Sons na rúa, etcétera; actos culturais como a Feira do Libro ou as xornadas da historia local; multitude de exposicións no Cenima, obras de teatro, bailes rexionais de O Feitizo e de A Subela”.

O alcalde engadiu que esta tempada tamén foi incrible “polas festas de verán da vila e das parroquias, por exemplo as cinco estupendas festas do Carme que temos no noso concello, algunhas delas multitudinarias como as de San Martiño e as de Foz; a Festa Normanda, que acabamos de rematar cun éxito absoluto; a celebración do San Juan, do Santiago, do San Lourenzo, festas que son de interese turístico; e outras máis coma as de Fondás, Vilaxoane, Marzán, Fazouro, a do Emigrante en Vilaronte, etcétera; festas gastronómicas coma a chicharrada no Día da Patria, o Foz Market, coas food trucks, o Zorza Celtas, a degustación de troitas en Fazouro, as churrascadas en Santa Cecilia e a mesma feira de gando en Cangas”.

Para Castiñeira os meses de xullo e agosto en Foz foron incribles ademais “pola cantidade de eventos deportivos que se desenvolveron durante todo o verán: as Noites Alternativas; a carreira popular Run Foz run, con cerca de mil participantes; o Costa Nova de fútbol, o torneo de tenis en Marzán, baloncesto e fútbol sala no Campo da Cabana, o torneo de andadura en Cangas e, por suposto, o paso antolóxico da Vuelta Ciclista a España polo centro urbano de Foz, máis outras actividades coma o bautismo náutico en moto de auga, e de iniciación ao kaiak, mergullo, vela, windsurf e pádel surf, que encheron a ría de Foz de cor e alegría. E para os máis pequenos, o programa Aberto por vacacións, os campus de patinaxe e de fútbol, as obras de teatro infantil, o San Lourenciño, etcétera. Foi incrible tamén por como luciron as nosas praias en todo o concello, abarrotadas de bañistas, con augas estupendas e limpas, sen incidentes substanciais e ben vixiadas; algunha delas como A Rapadoira que este ano celebrou os 30 anos da bandeira azul, coa Q de calidade de turística, certificados Emas e este ano con dúas novidades: catalogada como praia sen fume e que foi a base do tren turístico que este ano apostou tamén por Foz. Tamén foi incrible polo récord de visitas á basílica de San Martiño, pasando algún día das 550 visitas, ilustradas polo servizo municipal de guía, que está destacado e recoñecido en páxinas de calidade coma TripAdvisor. Incrible ademais pola cantidade de titulares e horas nos medios de comunicación, programas que recoñeceron o nivel turístico alcanzado no noso concello; e que dicir das redes sociais, pois por exemplo o facebook do Concello pasou de 5.000 seguidores, con novas que acadaron máis de 10.000 visitas, ou fotos, como as das alfombras florais do Día do Carme, que superaron os 600 megustas”.

E o rexedor municipal focense rematou comentando que “quizais vai ser un dos mellores veráns dos últimos tempos en Foz; e con esa idea é fácil pensar que todo se pode mellorar, pero vai ser dificilmente superable. Queridos veciños e visitantes, que ao final foron veciños tamén durante uns días, parabéns polo éxito acadado. E remato felicitando a todos aqueles que, dunha ou outra maneira, participaron na organización de todos estes eventos; e quero facer especial fincapé nas comisións de festas, as asociacións e clubs, o Centro Comercial Aberto, o persoal do Concello, a Policía Local, a Garda Civil, Protección Civil, socorristas e 061. Simplemente estivestes, coma o propio verán do 2016, incribles”.