A Mancomunidade estudará o xoves coa Mariña Federación e o IES de Foz a mellora da atención ao cliente nos locais de hostalería

A Mariña, 27 de setembro de 2016. A Mancomunidade de Municipios da Mariña reunirase este xoves, 29 de setembro, no IES de Foz coa Mariña Federación e con este centro de ensino. O obxectivo pasa por estudar as medidas a levar a cabo para mellorar a atención ao cliente nos locais de hostalaría e restauración.

O presidente da Mancomunidade, Alfredo Llano, explicou que “un dos cometidos que temos programados desde a Mancomunidade para facer unha mellora substancial na hostalería e na restauración, é un acordo/convenio entre o IES de Foz, a Federación de Comerciantes de toda A Mariña máis a Mancomunidade para establecer un mecanismo de formación, simposios, cursiños e de todo aquilo que sexa bo para mellorar sempre e redundar nunha maior calidade e mellor atención para os turistas que veñen á nosa zona”.

Llano anunciou que “imos facer unha xuntanza o vindeiro xoves no IES de Foz. Estaremos as partes implicadas, representantes de cada unha das asociacións e institucións. Imos comezar a ver se podemos xa darlle saída no mes de outubro ou novembro a unha iniciativa que consistirá, por exemplo, na mellora das cartas de presentación dun restaurante. Estas cartas tamén irán traducidas a varios idiomas. A ver se estes meses de outubro, novembro e decembro podemos ir facendo algo que sexa importante para ir dándolle para adiante a esta iniciativa”.

O presidente da Mancomunidade engadiu: “consideramos que pode ter boa acollida entre os restauradores e os hostaleiros. Imos facer posiblemente un curso de iniciación no propio IES, pero despois poderemos ir abríndonos a cada un dos concellos, ver cales son as necesidades máis urxentes e poder levar estes cursiños ou xornadas a cada un deles dos concellos”.