CIG Saúde A Mariña denuncia que dende principios da semana pasada as obras de ampliación do Hospital da Costa están paralizadas

Como vén sendo habitual en tempo de eleccións, asistimos a enésima posta en escea do que poderiamos denominar “a obra por excelencia” das campañas electorais do PP na Mariña. Semella difícil atopar unha farsa mais teatralizada que a da “Traxicomedia da ampliación do Hospital da Costa e o PP”. Tráxico polo abandono que vimos padecendo os mariñáns e mariñás dende a chegada de Feijoó, que alá polo 2009 e dende a festa da faba de Lourenzá, prometía a inminente ampliación do Hospital da Costa, a primeira de moitas promesas incumpridas.

Logo viría o plan funcional, o anuncio de licitación do plan director, a adxudicación deste, o concurso da elaboración do proxecto, a adxudicación do mesmo e o duplo de anuncios a outras tantas comunicacións en prensa e máis anuncios e visitas fulgurantes para por fin inaugurar …….. unha maqueta. A comedia continúa cando o luns, día 01 de maio, preséntanse varios conselleiros, delegada do goberno, alcaldes e demais políticos para inaugurar a “bombo e platillo” o estudo xeotécnico ………..do aparcadoiro subterráneo.

Despois de inaugurada a maqueta na que todos os espazos que agora se utilizan para aparcar os vehículos se converten en xardíns-, son moitos os mariñáns que, ao igual que CIG-Saúde, sabedores do gran interese do PP por construír aparcadoiros de xestión privada nos Hospitais (HULA, Álvaro Cunqueiro) pregúntanse cal será a empresa que vai xestionar o aparcadoiro e cal vai ser o custo que imos ter que pagar os usuarios.

A realidade para a CIG-Saúde é que a día de hoxe, o que temos, son 7 anos de mentiras do PP e un Hospital empequenecido, abandonado, con falta de persoal, de camas e servizos en precario.

A realidade é que sendo moi optimistas e tendo moita fe, atopámonos cun proxecto de ampliación que non dará resposta as necesidades básicas en materia de sanidade na nosa comarca. Unha ampliación que non recolle un aumento significativo do número de camas, que non contempla a instalación dunha resonancia magnética fixa, que non aumenta a carteira de servizos médicos a ofertar, que non aumenta o número de quirófanos, que non contempla unha gardería para axudar a conciliar a vida laboral e familiar das nosas traballadoras.

E tendo aínda moita máis fe, se algún ano rematan a ampliación do noso hospital, volveremos a atoparnos cun centro obsoleto que non chegará para atender as demandas sanitarias da nosa comarca.

Esta comedia continúa hoxe cando nos atopamos que os únicos movementos feitos, foron movementos de terra e a construción parcial dun heliporto desaparecendo de súpeto tanto a maquinaría como as persoas encargadas de realizar as obras.Se en plena campaña electoral Feijóo paraliza as obras desa suposta ampliación, que podemos esperar despois das eleccións do 25 de setembro?

A conclusión para os dirixentes do PP e evidente: temos unha campaña electoral, temos un obxectivo publicitario, non temos vergoña e por tanto, queda inaugurado esta suposta ampliación do Hospital da Costa. Que non temos camas libres?, a quen lle importa iso?, mellor calámolo que estamos en campaña electoral.