Son Viveiro chama a atención sobre as prazas dos campamentos de verán e o acceso dos cans aos espazos públicos

O Grupo Municipal SON VIVEIRO vén de rexistrar uns rogos para seren incluídos na orde do día do vindeiro Pleno do mes de setembro no
Concello de Viveiro.

1o Sobre os campamentos municipais de verán; foron varios os veciños e veciñas que nos comentaron que as solicitudes presentadas nos campamentos de verán organizados por este Concello sobrepasaron amplamente a capacidade de prazas dispoñibles, o cal provocou que varias nenas e nenos do noso municipio se viran privados do acceso aos mesmos.

Tendo en conta que a creación de tales campamentos veu motivada en boa medida para permitir a conciliación da vida familiar no período de vacacións escolares, dirixímonos ao Grupo de Goberno para que:

– No caso de que nalgún dos vindeiros anos volva a acontecer algo similar e co obxectivo de que poida gozar deste servizo o maior número de nenas e nenos e reducir o custo económico do mesmo de xeito máis homoxéneo, o uso dos campamentos municipais de verán sexa rotativo por quincenas.

– A adxudicación das prazas teña en conta o estado laboral dos pais, nais ou representantes legais dos nenos e nenas que as soliciten.

– Se lle dea prioridade na ocupación das prazas dispoñibles ás nenas e nenos censados no noso Concello.

2o Sobre o uso dos espazos públicos por arte dos cans; o pasado 17 de febreiro do 2015, o Concelleiro de Seguridade Cidadá do noso municipio alertou á prensa da existencia de numerosas queixas da veciñanza derivadas da presenza constante de animais sen correa en zonas públicas, feito que provocaba situacións de risco para as e os viandantes, o cal motivou que, tras unha reunión coa Policía Local, se manifestase a súa intención de poñer en marcha unha campaña de concienciación cidadá para que fosen respectadas as normas recollidas no artigo 15 da “Ordenanza de buen gobierno” deste Concello.

Ao mesmo tempo, comentou a necesidade de colocación de placas de prohibición de cans soltos en distintas zonas de xogos infantís, parques públicos e paseos do municipio, e lembrou a obriga de recoller os excrementos dos cans por parte da persoa que os acompañe.

Debido a que, ata a data, boa parte das medidas propostas en dita publicación xornalística non foron levadas a cabo e as queixas no mesmo sentido por parte das veciñas e veciños persisten, dirixímonos ao Concello para que:

– Se efectúe unha axeitada sinalización da prohibición de presenza de cans nas zonas de xogos infantís, parques públicos, praias e paseos marítimos e fluviais do Concello.

– Se inicie unha compaña de concienciación acerca do cumprimento da normativa municipal que, no seu artigo 15, regula a recollida de excrementos caninos.

– Se cree un equipo de traballo para a redacción e posta en funcionamento dunha nova ordenanza que regule o uso conxunto e a convivencia cívica entre cidadás/cidadáns e cánidos.

– Se habilite unha zona do municipio para uso e recreo de cans.

Con estas accións, SON VIVEIRO continúa traballando a prol dun aumento da conciencia cívica entre a veciñanza da nosa vila.