Toni Cantó (C’s): “Cidadáns é a aposta pola innovación que necesita o sector primario en Galicia”

Lugo, 10 de setembro. “Cidadáns é a aposta pola innovación que necesita o sector primario en Galicia tras moitos anos de políticas ineficaces que non deron ás profesionais solucións aos problemas dos diferentes sectores” afirmou Toni Cantó en Lugo tras reunirse co colectivo Agromuralla e a Asociación de Mulleres Rurais acompañando a Cristina Losada, candidata de Cidadáns á Presidencia da Xunta de Galicia.

O Deputado Nacional de C’s afirmou que “o potencial do sector primario en Galicia require que desde as administracións ofrezamos facilidades ós profesionais do sector para impulsar a innovación e a modernización que nos permitan ser competitivos nun mercado global”.

Cantó apostou por coordinar o labor das explotacións lácteas e pediu un Goberno de España “coa fortaleza e o liderado suficientes para defender en Bruxelas os intereses dos nosos gandeiros”.

Cristina Losada (C’s) remarcou o compromiso da formación laranxa co sector primario e mostrou a súa confianza en que “políticas de investimento e impulso ben feitas, con seriedade e con participación dos profesionais do sector, permitan aproveitar todo o potencial galego” á vez que apostaba polo sector lácteo “como un elemento que fixa poboación no mundo rural e axuda a loitar contra o drama do despoboamento que sofre Galicia”.

Durante a súa visita a unha explotación gandeira nos arredores de Lugo Toni Cantou finalizou cunha mensaxe de optimismo “Se Cidadáns é decisivo, o próximo Goberno da Xunta deixará de ser un obstáculo e pasará a ser un impulso para a agricultura, a gandería, a pesca e o sector forestal en Galicia”.