En Marea presenta unha proposición no Congreso para que se axilice o trasvase de area na praia de Covas como medida paliativa urxente

Madrid, 7 de outubro de 2016. O deputado de En Marea por Lugo no Congreso, Miguel Anxo Fernán Vello, presentou unha proposición non de lei que insta ao Ministerio de Medio Ambiente a “axilizar o proxecto de trasvase de área na praia de Covas (Viveiro) debido á súa grave situación de deterioro. É só unha medida paliativa urxente e temporal”.

E dada a total falla de concreción existente, Miguel Anxo Fernán Vello demanda que se concreten prazos de execución así como a distribución do investimento a realizar tanto por parte do estado como da Xunta.

Mais consciente da temporalidade desta medida, o deputado de En Marea insta ao Goberno a aprobar, en colaboración coa Xunta de Galiza e co concello de Viveiro, un Plan de Rexeneración e Rehabilitación da Praia de Covas que “sexa respetuoso co medio ambiente e co ecosistema mariño, co obxetivo de remediar a grave degradación do areal debido ao impacto negativo dos recheos e das obras portuarias executadas nos últimos anos”.

Anuncios en periodo pre eleitoral que logo non se cumpren
Miguel Anxo Fernán Vello reprocha ao deputado do PP en Cortes, Jaime de Olano, que “no pasado mes de xuño, en pleno periodo pre eleitoral, anunciase que na segunda quincena de setembro se iniciarían as actuacións de trasvase de área. Estamos a 7 de outubro e non hai nada de nada. A praia continúa deteriorándose”. O deputado de En Marea tamén quer amosar a “súa estraneza porque este tipo de anuncios procedan dun deputado no Congreso en lugar de vir dalgún responsábel do Ministerio de Medio Ambiente ou da Xunta, que sería o normal. Máis en xuño as elecións galegas aínda estaban pendentes, era época de anuncios que logo non se cumpren”.

A cuestión, puntualiza Miguel Anxo Fernán Vello, “é que a día de hoxe non existe un horizonte temporal para unha actuación urxente e necesaria, sobre todo porque estamos ás portas do inverno, estación na que a situación se empiora”.

As políticas do cemento alteraron o ecosistema mariño
Para o parlamentar de En Marea, a idea de trasvasar área “non deixa de ser unha actuación temporal de urxencia que non vai cambiar a situación, nin vai repór as correntes, nin solucionará todo o impacto provocado no ecosistema mariño. É tan só unha medida paliativa para parar o deterioro dunha praia emblemática.

O deputado por Lugo de En Marea afirma que a praia de Covas “debería servir para reflexionar sobre as políticas de abuso do ladrillo e do cemento, favorecedoras de determinados intereses pero sempre alleas á preservación do medio ambiente ou a un desenvolvemento sostíbel”. Pón de manifestó que a Ría de Viveiro sofre as consecuencias do impacto de recheos e outras obras portuarias que modificaron a dinámica das ondas, variaron as correntes, razón que fai que as mareas leven a área da zona de Os Castelos á zona situada no outro extremo, cara O Cembedo, onde se vai acumulando. E así é como o areal vai desparecendo”.

Miguel Anxo Fernán Vello salienta a enorme preocupación social polo estado desta coñecida praia. “Situación que levou a centos de habitantes da comarca a facer actos de protesta e incluso unha cadea humana para demandar que se adopten medidas de protección do areal”.