O Concello de Viveiro da a coñecer a colaboración dos comerciantes e hostaleiros coas festas de verán e San Roque

Como vén sendo habitual, este verán o Concello de Viveiro dirixiuse aos comerciantes e hosteleros para pedir a súa colaboración económica para organizar as festas de San Roque e de Verán, tendo en conta que outros eventos organizados ao longo do ano corren a cargo do concello, como a Feira Renacentista, o Belén…. En anos anteriores, o equipo de goberno achegábase persoalmente aos establecementos para pedir a súa colaboración. Este ano decidiuse modificar o procedemento e remitir a cada un deles unha carta na que se indicaba o número de conta no que, os empresarios que o desexaran, podían realizar os seus ingresos; pola experiencia destes anos, entendeuse que esta era a mellor forma de proceder, pois dábanse situacións nas que se ía a horas nas que non lles resultaba adecuada ou nas que non estaban os propietarios, para evitar que tiveran que entregar a colaboración económica diante dos clientes, etc.

Así pois, cómpre sinalar que se remitiron cartas solicitando a colaboración coas festas do verán a 286 empresas; a data 26 de outubro de 2016, son 70 empresarios os que ingresaron as súas colaboracións no número de conta facilitado para este fin, ascendendo a cantidade recadada a 8.505,00 euros (inferior ao recaudado en 2015, cando se realizaron colaboracións por un importe total de 14.650,00 euros).

Consideramos que o Concello de Viveiro, como organizador das Festas de Verán e de San Roque 2016, debe dar conta destes datos e agradecer publicamente a todos aqueles que, atendendo á nosa solicitude, colaboraron economicamente para que, unha vez máis, o Concello de Viveiro organizara as festas.