O 4 de febreiro será o día de Viveiro en Xantar 2017

Viveiro 27-1-17. O Concello de Viveiro contará cun stand propio, no que durante os días da feira se difundirá o material de promoción turística do Concello e mais aqueles folletos remitidos, para este fin, polos establecementos hostaleiros do municipio; o stand será atendido pola técnico de turismo deste concello e nel tamén se mostrarán, entre outro material, diversos elementos procesionais facilitados pola Xunta de Cofradías da Semana Santa.

Ademais de estar presente no stand durante toda a feira, o 4 de febreiro Viveiro será o protagonista de Xantar 2017 ao celebrarse o Día de Viveiro; ese día, ás 13:30, ofrecerase unha degustación gratuíta dunhas 300 racións de dous produtos gastronómicos vinculados a dúas das nosas festas con declaración de interese turístico: a merluza do pincho (cociñada en empanada e salpicón) e o Pan dos Apóstolos (doce típico de Semana Santa). Antes do inicio da degustación, a Alcaldesa do Concello de Viveiro realizará unha intervención para presentar o noso municipio a todos os asistentes, dando a coñecer os seus principais recursos turísticos (patrimonio, natureza, gastronomía, festas….); estarán presentes, ademais, a Concelleira de Turismo, membros da directiva da Xunta de Cofradías e membros da directiva da Asociación Cultural e Deportiva Penalba.

Finalmente, dende o Concello de Viveiro, quérese dar as grazas publicamente á Xunta de Cofradías da Semana Santa e á Asociación Cultural e Deportiva Penalba, pola súa colaboración durante a organización, montaxe e degustación dos produtos, e mais á empresa Puerto de Celeiro, por donar 75 kilos de merluza para este fin.