A candidata foi apoiada polos afiliados no congreso local celebrado este venres coa participación de representantes da formación popular a nivel autonómico, provincial, comarcal e local
Vilalba, 28 de xuño de 2025. Celine Fernández foi proclamada presidenta de Novas Xeracións de Vilalba no congreso local da formación xuvenil do Partido Popular.
A nova presidenta, de 25 anos e graduada en bioquímica e máster en Formación do Profesorado e Bioloxía e Xenética, estivo acompañada por membros do Partido Popular de Vilalba e da comarca; ademais da secretaria xeral do PPdeG, Paula Prado, a presidenta do PP da provincia, Elena Candia, a presidenta de NNXX de Galicia, Nicole Grueira, e o presidente de Novas Xeracións da provincia, Miguel Gallego.
Celine Fernández subliñou que encabeza un proxecto “baseado na ilusión, o traballo en equipo e a defensa activa dos intereses da xuventude” e comprometeuse a “construír un proxecto aberto, participativo e útil para todos os mozos e mozas da vila”.
A nova presidenta de NNXX de Vilalba reivindicou “a necesidade de que a mocidade teña voz nos espazos de decisión”, ademais de asegurar que “temos talento, ideas e gañas. Só precisamos oportunidades. E iso é o que queremos construír con Novas Xeracións de Vilalba: unha ferramenta de cambio e de orgullo para o noso pobo”. Nese sentido, amouse convencida de que “Vilalba é máis que un punto no mapa: é historia, cultura e tradición, pero tamén pode e debe ser innovación, oportunidades e futuro”.
Pola súa banda, a secretaria xeral do PPdeG, Paula Prado, puxo en valor que cando se lle pregunta á mocidade galega nunhas eleccións, o Partido Popular sexa sempre a formación con máis apoio. “É o resultado da nosa aposta pola mocidade con feitos e non só con slogans, fronte a un socialismo que compra aos mozos con promesas pero non lles ofrece nada e fronte a un independentismo que non pode ofrecerlles máis futuro que unha utopía”.
Así mesmo, salientou o feito de que unha organización xuvenil como Novas Xeracións, cunha lucense como Nicole Grueira como líder, teña estrutura nun concello como Vilalba: “Demostra que a mocidade se implica tamén na política do rural e, sobre todo, en querer mudar o rumbo dos seus concellos”.
A presidenta do PP de Vilalba, Sandra Vázquez, destacou “a proximidade e o compromiso” de Celine Fernández, que formou parte da candidatura ás últimas eleccións municipais; pero, sobre todo, “a súa positividade”. Así mesmo, agradeceu a todo o equipo “que dean un paso adiante” e que “sirvan como exemplo de compromiso e dedicación para a mocidade vilalbesa”.
Tamén interviu a presidenta de NNXX de Galicia, a lucense Nicole Grueira, que subliñou que “este congreso de Novas Xeracións é a mellor mostra de que a xuventude galega está máis activa, máis preparada e máis comprometida que nunca. Somos unha organización que medra, que se renova e que está presente en todo o territorio, pisando cada concello, cada comarca, e dando voz aos mozos e mozas”.
Así, engadiu que “cada vez somos máis os e as que nos incorporamos ao proxecto do presidente Alfonso Rueda. Porque confiamos no seu liderado, no seu proxecto para Galicia e na súa aposta decidida pola xuventude”.
E o presidente provincial de Novas Xeracións, Miguel Gallego, incidiu na “importancia de que os mozos e mozas nos impliquemos na toma de decisións e na construción dun futuro con máis oportunidades, dinamismo e progreso, tanto en Vilalba como no conxunto da provincia de Lugo”.
Así mesmo, explicou que “seguimos sumando afiliados” e avanzou que “despois deste congreso local en Vilalba, ao longo do verán, Novas Xeracións continuará desenvolvendo reunións, actividades e novos congresos por toda a provincia, consolidando así a súa implantación territorial”.
EXECUTIVA DE NOVAS XERACIÓNS DE VILALBA
A executiva de Novas Xeracións de Vilalba que encabeza Celine Fernández contará con outros nove mozos e mozas con idades comprendidas entre 21 e 29 anos e con formación e ocupacións polivalentes:
– Sandra de Bernardo, secretaria xeral
– Carlos López Lozano, coordinador
– Cristina Muñiz, responsable da área de redes sociais e comunicación
– Adriana López Eimil, responsable da área de Medio Rural
– José Manuel Noche, responsable da área de Deportes
– Eva Pardo, responsable da área de Políticas para a Xuventude
– María Vázquez, responsable da área de Empresa e Comercio
– Carlos Rivas, responsable da área de Tecido Asociativo
– Uxía López, responsable da área de Cultura
Baixo o título “A guerra en Oriente Medio. Do xenocidio en Palestina á agresión a Irán”, o analista internacional Duarte Correa ofrecerá unha intervención centrada na evolución do conflito, o impacto humanitario e as implicacións xeopolíticas da escalada bélica na rexión.
A proba, organizada polo CP Altrúan, reunirá 137palistas dos seis clubs lucenses de augas tranquilas que participan na competición: o propio Altruán, o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo. O deputado de Mocidade Daniel García achegouse esta tarde a Ribadeo para presentar a proba, que comezará ás 15.30 coa saída dos prebenxamíns e benxamíns. A continuación e de forma escalonada, desenvolveranse as probas das categorías infantil, alevín e cadete e xuvenil.
A partir das 19:45 horas abrirán a xornada o Cuarteto Illa Pancha e Tradigalu, mentres que desde as 20:00 horas se poderán degustar hamburguesas á parrilla, bocadillos de panceta e chourizos asados. Xa pola noite, ás 21:30, tomarán o relevo Mi Rollo es el Rock, antes da tradicional fogueira de San Xoán, prevista para as 00:00 horas. A celebración, organizada por A Rebolaxe coa colaboración do Concello de Cervo e a Deputación de Lugo, inclúe tamén o sorteo dunha paleta de cocho e contará con aparcamento habilitado no Estanco da Praia do Torno.
A Garda Civil de Burela tomou declaración este 10 de xuño a unha representante do departamento en liña de Porcelana de Sargadelos, que denunciou unha estafa na que se emprega a imaxe da empresa para enganar clientes. Segundo explicou, desde finais de abril están a aparecer páxinas web falsas con descontos do 80% e perfís fraudulentos en redes sociais como Instagram, TikTok e Facebook, a través dos que varios usuarios xa foron estafados. A compañía presentou denuncias contra distintos dominios e contas, das que só unha continúa activa, e achegou tamén os rexistros da marca e as comunicacións realizadas ante Meta. A denuncia foi formalizada no cuartel da Garda Civil de Burela, onde quedou incorporada ás dilixencias abertas polo corpo.
O deputado galego Francisco Millán Mon explicoulles o día a día da súa actividade nesta cámara e a importancia da Unión Europea para Galicia e viceversa. Desde a dirección do centro agradecen “a súa exposición e o trato dispensado ao alumnado e profesorado desprazado a Bruxelas”. Neste 2026 cúmprense 40 anos da adhesión de España á Comunidade Económica Europea, así se denominaba naquel momento. O IES de Ribadeo é Escola Mentora do Programa Escolas Embaixadoras do Parlamento Europeo.
Foi unha xornada máxica na que a música e a convivencia se deron a man nunha contorna única. Os instrumentos de corda encheron de melodías os xardíns do centro, creando unha atmosfera especial que emocionou ao público asistente e puxo en valor o talento e a ilusión da mocidade. A alcaldesa de Cervo, Dolores García Caramés, non quixo perderse esta cita tan especial e desfrutou da tarde xunto ás persoas usuarias, e o persoal do centro. Durante o encontro, agradeceu o convite e felicitou á organización por promover actividades que fomentan a cultura, a inclusión e os espazos de encontro entre a veciñanza.
A mostra, aberta na sala de exposicións do Auditorio Municipal de luns a venres entre as 18:00 e as 22:00 horas, reúne preto de 30 obras de artistas emerxentes e consolidados, ofrecendo diversas miradas sobre a paisaxe, a identidade, a memoria e a realidade contemporánea. A alcaldesa, Marta Rouco, destacou o valor de que Vilalba forme parte desta programación compartida e o impacto positivo que supón para a actividade cultural local.
