Os estudantes ribadenses participan estes días en dez actividades, que se enmarcan no proxecto “entre arcos e cantís”, co obxectivo de dar a coñecer o patrimonio presente no litoral de Ribadeo

Ribadeo, 15 de novembro de 2017. O Concello de Ribadeo segue a traballar no seu proxecto Entre Arcos e Cantís, que ten como obxectivo a creación dun turismo diferenciado e sostible empregando a xeodiversidade do territorio como fío condutor apostando pola valorización da biodiversidade do todo o litoral de Ribadeo, transformándoo nunha oportunidade para o aproveitamento socioeconómico e compatibilizándoo coa súa conservación e mantemento.
Dentro do proxecto Entre Arcos e Cantís incorpóranse accións de intervención educativa, que pretenden implicar a todos os centros do territorio “tendo coma obxectivos a mellora do coñecemento do patrimonio xeolóxico, natural e cultural do noso litoral no eido da escola. Entendemos que a incorporación destes coñecementos fomentará a conservación do patrimonio pola cidadanía desde a idade escolar. Asemade dentro do proxecto está planificado a creación de unidades didácticas especialmente deseñadas para o coñecemento do litoral e a súa biodiversidade e que sirvan de ferramentas aos centros escolares”, sinalan desde a Concellaría de Desenvolvemento Local e Turismo.
O 7 de novembro desenvolveuse un Obradoiro de Xeoloxía dirixido aos rapazas de 1º e 2 º de Bacharelato do IES Dionisio Gamallo, “con esta actividade o alumnado tivo a oportunidade de achegarse á xeoloxía de Galicia e aos procesos que tiveron lugar durante a súa historia xeolóxica”.
O 8 de novembro realizáronse saídas de bioloxía e xeoloxía ás Catedrais e Cegoñas dirixidas ao alumando de 4º da ESO e 1º de Bacharelato do IES Dionisio Gamallo Fierros.
Desde Desenvolvemento Local explican que “nestas visitas o alumnado tivo a oportunidade de coñecer as características xeomorfolóxicas do litoral de Ribadeo, a súa evolución e elementos que o constitúen así como outros coñecementos do hábitat e riscos medio ambientais”
O 9 de novembro ofreceuse unha saída que tiña coma fin profundizar no coñecemento do patrimonio arqueolóxico do litoral de Ribadeo, dentro desta actividade cursáronse visitas aos castros costeiros de As Grobas e Fornelos, e os nenxs puideron coñecer máis de cerca a forma de vida dos nosos devanceiros”.
E o vindeiro venres, 17 de novembro, durante a mañá, levaranse a cabo as ultimas saídas escolares. Será a quenda do Colexio Sagrado Corazón e do CEIP Gregorio Sanz, que realizarán visitas xeolóxicas As Catedrais
Desde o Concello engaden que “son un total de 10 actividades dirixidas aos centros escolares que teñen como fin dar a coñecer o noso patrimonio presente no litoral de Ribadeo”.