En curso as obras de execución do aparcadoiro de autocaravanas de Alfoz

Alfoz, 18 de abril de 2018. O Concello de Alfoz está a realizar as obras de execución dun aparcadoiro de autocaravanas no entorno do Campo de Fútbol Municipal de Alfoz. A instalación contará cunha zona de estacionamento, na que unha das prazas estará dotada con abastecimiento de auga e saneamento, así como dunha vía de acceso paralela ao campo de fútbol bordeando o aparcadoiro e quedando unido coa vía LU-P-0202.

Ademáis tamén se está a executar o reasfaltado, mediante aglomerado en quente, da vía que une a LU-P-0202 coa LU-P-0203, duns trescientos metros de lonxitude e catro metros de ancho, así como os accesos ao propio Campo de Fútbol Municipal de Alfoz.

O proxecto está financiado con cargo ao Plan Único da Deputación Provincial de Lugo, ascendendo o total das actuacións a 35.918,28 €.

Xabier Pardiñas, Tenente Alcalde de Alfoz, indica que as obras “responden á necesidade de mellorar os accesos ao barrio e as instalacións deportivas, así como fomentar o turismo no concello dando resposta ao fenómeno do turismo en autocaravana, que ten experimentado un crecemento moi importante nos últimos anos”. Desde o Concello de Alfoz indican que as obras estarán rematadas a finais de mes.