Cervo, 11 de maio de 2018.- A Casa da Cultura de San Cibrao acolleu este venres a presentación do Campus de Baloncesto EntreNós, que terá lugar na vila entre o 1 e o 7 de xullo.
Na rolda de prensa participaron o alcalde de Cervo, Alfonso Villares, o edil de Deportes, José Ramón Soto, o presidente do CB Breogán, Jesús Lázare, o xogador do CB Clavijo, Erik Quintela –que participará activamente no Campus- e o presidente do CD San Ciprián, e club organizador, Eduardo Rubal.
Na actividade deportiva poderán participar todos os mozos e mozas nacidos entre o 2002 e o 2008 (ambos incluídos); e a inscrición permanecerá aberta ata o 25 de xuño.
O principal distintivo deste Campus é que tres xogadores en activo de primeiro nivel convivirán e adestrarán cos participantes día tras día; polo que os rapaces terán a oportunidade de compartir charlas e intercambiar experiencias con profesionais deste deporte.
Os xogadores participantes son Erik Quintela (xogador do CB Clavijo de Logroño, LEB Oro), Adrián Chapela (xogador do HLA Lucentum Alicante, LEB Plata) e Sergi Quintela (Xogador do CB Breogán, recentemente ascendido á liga ACB). Os tres naceron da década dos noventa, son de Lugo e creceron nesta cidade como baloncestistas.
O Campus EntreNos ofrece aos participantes ademais outro tipo de actividades complementarias relacionadas co deporte e adaptadas á contorna como é a práctica de surf e piragüismo, pero tamén coa cultura, como visitas ao Museo do Mar ou a visualización de diferentes pezas audiovisuais no auditorio da Casa da Cultura.
O rexedor de Cervo, Alfonso Villares quixo felicitar a toda a familia do CD San Ciprián polo seu grao de implicación para promover o deporte, neste caso o baloncesto, no noso Concello, e puxo en valor o seu traballo destacando “o tremendo esforzo e horas de dedicación investidas para poder poñer en marcha un Campus destas características”.
Pola nosa banda –engadiu- “contan con todo o noso apoio e poñemos á súa disposición todas as instalacións municipais necesarias para que tanto os xogadores e xogadoras participantes, como os adestradores que nos visiten, poidan vivir unha experiencia inesquecible, co fin de que todos leven consigo un bo recordo da súa estancia no noso concello”.
Os participantes terán como campamento base as aulas do CEIP Cervo nº1, en San Ciprián, que estará acondicionado para a ocasión con literas e todo o equipamento necesario, e terán servizo de cociña no propio centro; ademais de poder utilizar o patio de xogos que conta con cancha de baloncesto e porterías; e unha zona verde de esparcimento en plena natureza dentro do recinto pechado. Este colexio conta, así mesmo, cun pavillón deportivo que foi reformado en 2009.
O escenario dos adestramentos será o Pavillón da Veiga, onde os rapaces e rapazas recibirán as nocións da man dos tres xogadores estrela, e tamén de diferentes adestradores profesionais que levarán con eles o peso das sesións, sempre tuturizadas polo Director Técnico do Campus e director deportivo de Estudiantes Lugo, Cristino Menor.
Os asistentes, ademais de practicar baloncesto, poderán desfrutar da contorna do Concello; e empregar as instalacións da Piscina Olímpica Municipal, única destas características na provincia de Lugo.
Os prezos por xogador ascenden a 220 euros en media pensión e 330 euros en pensión completa.
A organización puxo en funcionamento a web http://campusbasketsanciprian.com/ onde dan cumprida conta de todo canto rodea ao Campus e poñen a disposición dos interesados o teléfono de contacto 633.16.17.41 e o correo info@campusbasketsanciprian.com para máis información.
Pola súa banda, o edil de Deportes, José Ramón Soto quixo tamén agradecer a todos as entidades que colaboran e patrocinan o evento como son 325 Sportwear, que vestirá a todo o staff técnico e obsequiará con equipación e camisetas aos participantes, ao CB Breogán, a Distribuciones Carreiras, ao Supermecado Familia, e a Fontecelta, pola súa implicación no evento.
Competirán durante tres días xunto a outras dezaseis escolas de todo o mundo, elaborando catro propostas de pizza: Polbo á galega, con polbo galego, queixo San Simón e allada picante; Bosque galego, con crema de castañas e mel picante; Terra meiga, con zorza picante; e Rapadoira, con setas, queixo azul e pera. As estudantes viaxan acompañadas pola súa profesora, Conchi Carreiras, coa que levan tempo preparando as receitas. Esta é a terceira participación do IES de Foz neste certame, no que xa acadaron un segundo posto en edicións anteriores. A actividade forma parte do programa Erasmus+ da FP, financiado pola Unión Europea, que facilita a participación do alumnado en competicións de habilidades profesionais por toda Europa.
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo.
O sindicato denuncia a decisión unilateral da empresa de retirar días de descanso e implantar quendas que dificultan a conciliación. As concentracións serán nos centros de traballo de Foz (Uxío Novoneira s/n) e Ribadeo (Avda. Galicia 27). Lémbrase que non é unha folga e apélase á solidariedade da plantilla para defender as condicións laborais conquistadas.
Ás 15:15 horas deste martes, un particular solicitou asistencia sanitaria tras a caída dun raio no lugar de Castro de Igrexa (Cazás, Xermade). Varias persoas sentiron os efectos da descarga eléctrica e unha delas quedou atolada. Tras dar aviso ao Servizo de Urxencias Sanitarias de Galicia-061, Garda Civil e Protección Civil, a persoa afectada foi evacuada consciente ao Hospital Universitario Lucus Augusti.
A exposición, instalada no Centro Comarcal Pazo de San Tomé, invita a observar con calma, descubrir historias e poñer en valor un patrimonio vivo que forma parte da nosa identidade. Unha maneira diferente de achegarnos ao mundo rural que tanto significa para As San Lucas.
A viaxe, enmarcada no proxecto «Relevo Xeracional: O Futuro do Mar» e organizada en colaboración co GALP Itsas Garapen Elkartea, permitiu achegarse a iniciativas como Kofradia Basque Seafood, a Escola de Pesca de Ondarroa, AZTI, Albaola ou o Itsas Museo de Donosti, así como a proxectos vinculados directamente á actividade pesqueira e á divulgación, incluíndo o uso de realidade virtual. O intercambio con Euskadi permitiu coñecer modelos que combinan formación, investigación, transmisión do coñecemento e modernización do sector, contribuíndo a identificar novas vías para facilitar a incorporación da mocidade á actividade pesqueira e garantir a continuidade das comunidades costeiras galegas.
Os servizos sanitarios trasladaron ao hospital a tres persoas implicadas nunha colisión frontal en Castro de Rei. Unha delas tivo que ser excarcerada polos Bombeiros de Vilalba. Contra as 11:15 horas deste martes, un particular informou ao 112 Galicia dun choque entre dous vehículos no quilómetro 71 da N-640, á altura da parroquia de Viladonga. Desde o punto, os alertadores sinalaron que unha persoa permanecía atrapada. Desde o Centro Integrado de Atención ás Emerxencias activouse un operativo no que participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada. Os bombeiros liberaron á persoa, que foi trasladada xunto con outros dous feridos ao hospital en ambulancia.
