A Pomba do Arco renova a súa directiva coa mirada posta no trinta aniversario

Foz 29-10-18. Marcelino Villarino Cageao afirmou “ o compromiso da asociación por manter a programación estábel que vimos desenvolvendo con carácter periódico ao longo do ano, entre os que destacamos as xornadas de historia Local, camiño xa dos vinte anos, o Touporroutou, outra actividade clásica do Antroido local, as xornadas de arte, a Festa da Palabra, as presentacións de libros ou as diversas palestras sobre temas de actualidade. Ao tempo, queremos potenciar a labor que os diversos grupos que traballan dentro da asociación veñen desenvolvendo, como o club de lectura, A Pombiña, o noso club de lectura infantil dirixido a poñer en contacto ás nenas e nenos coa literatura en lingua galega ou o grupo de teatro que prepara o estreo dunha nova obra para o quince de decembro no que significa a volta aos escenarios dun colectivo que fixo as súas primeiras actuacións á volta do 2001”.
O presidente da asociación cultural A Pomba do Arco adiantou que “ a asociación prepara para o ano que ven novas actividades, onde a conmemoración do trinta aniversario vai xogar un papel importante. A actividade continuada ao longo destas últimas tres décadas é posíbel porque unha parte da nosa sociedade está empeñada en que Foz conte cunha acción cultural estábel comprometida coa cultura e coa lingua do país, como se acredita na resposta dos nosos eventos e en toda a masa social que participa do noso colectivo como adherente. A continuidade da asociación, cando menos outros trinta anos máis, será posíbel na medida que máis persoas se acheguen á nosa actividade, sendo fundamental a incorporación dunha nova xeración ao colectivo que introduza novas ideas e propostas”.