Alfredo Llano reclama que as autopsias se volvan realizar no Hospital da Costa para evitar esperas innecesarias ás familias mariñás

Burela, 5 de outubro de 2018. O alcalde, Alfredo Llano, estivo a primeira hora desta mañá no porto para acompañar á familia do mariñeiro falecido en alta mar hai uns días. Ao peirao chegou o seu cadáver hoxe e foi trasladado ao HULA, en Lugo, para practicarlle a autopsia. Llano fai unha chamada de atención para que este servizo se preste de novo no Hospital da Costa, co fin de evitar esperas innecesarias ás familias.
O rexedor contou que “acabo de regresar do porto de Burela onde recibimos o cadáver dun veciño da comarca que traballaba nun barco e que faleceu en alta mar, derivado aparentemente do que foi un infarto de miocardio. Estábamos todos afectados como é lóxico, ademais a familia e a xente do mar sinte dunha forma especial estes falecementos”.
Alfredo Llano engadiu que “como digo sempre que ocorre algo así este servizo de autopsias debera seguir en Burela, dado que agora mesmo ten que marchar para Lugo, a familia ten que agardar, temos que enviar un vehículo a Lugo e traelo outra vez para aquí. En consecuencia creo que é unha mala xestión dos servizos sanitarios porque hai que ter en conta á familia e o lugar onde estamos”.
O alcalde burelés lembrou que “o servizo de autopsias fora recuperado no ano 2007-2008 co goberno de Touriño e chegou no 2009 outra vez o Partido Popular e retirou este servizo, que eu creo que se debera manter na nosa comarca polas condicións que aquí se poden dar como xa se está vendo. É certo que son desgrazas, pero cada vez que veñen é cando se nota esta falta de servizo que debéramos ter na Mariña”.
Llano fai fincapé en que “unha vez máis reclamo este servizo porque penso que non debera ser xa substituído nin sacado. É unha chamada de atención porque evidentemente repercute na familia, no servizo e en moitas cuestións. Hai que pensar que na Mariña somos 75.000 habitantes e existe unha serie de casuística que dalgunha maneira obriga a ter este servizo aquí, dado que hai moita industria, moita embarcación, moito tránsito, etc… polo tanto nosoutros unha vez máis reclamamos este servizo que non se debera ter sacado nunca do Hospital de Burela”.