A Xunta achega preto de 700.000 euros aos concellos lugueses para levar a cabo accións de promoción da igualdade

 Lugo, 27 de xuño de 2019.- Os concellos da provincia de Lugo percibirán este ano axudas da Secretaría Xeral da Igualdade por un importe de 688.800 euros para levar a cabo distintas accións de fomento da igualdade. Así o explicaron hoxe a secretaria xeral da Igualdade, Susana López Abella, e o delegado territorial da Xunta, José Manuel Balseiro, nunha rolda de prensa na que deron conta da resolución desta convocatoria de achegas dirixidas a entidades locais.

As axudas benefician a 44 municipios da provincia, tanto para proxectos individuais como de xestión compartida. Están cofinanciadas polo Fondo Social Europeo e destinaranse a financiar iniciativas en catro liñas de actuación. Este ano incorpórase como novidade o programa de sensibilización, información e difusión sobre igualdade e prevención da violencia contra as mulleres financiado con fondos procedentes do Pacto de Estado contra a violencia de xénero. Ademais, a través destas axudas desenvólvense iniciativas de prevención e tratamento integral da violencia de xénero, de fomento da conciliación e de apoio aos Centros de Información ás Mulleres (CIM).

O programa con maior dotación orzamentaria é o que se destina ao funcionamento dos CIM, cuxa contía ascende na provincia de Lugo a 492.180 euros, que se distribúen en 11 centros situados en Burela, Palas de Rei, Sarria, Monforte de Lemos, Chantada, Ribadeo, Mondoñedo, Quiroga, Lugo, Viveiro e Vilalba. Salvo os tres últimos, os demais están agrupados con outros municipios da contorna, polo que en total os concellos beneficiados ascenden a 36.

Estas achegas diríxense a financiar os custos do persoal que traballa nestes centros, en concreto os postos de dirección, asesoramento xurídico, atención psicolóxica, axentes de igualdade ou de fomento do traballo en rede e de dinamización do territorio con enfoque de xénero. No caso da provincia de Lugo, as axudas concedidas contribuirán ao mantemento de 28 postos de traballo.

Por outra banda, a liña de fomento da conciliación da vida persoal, laboral e familiar contará con 107.800 euros para financiar accións en 11 concellos: Mondoñedo, Outeiro de Rei, Guitiriz, Xove, O Valadouro, Sober, Palas de Rei, Alfoz, Rábade, Xermade e Ourol.

En canto ás accións de sensibilización, información e difusión sobre igualdade e prevención da violencia contra as mulleres, contarán con axuda 15 entidades locais da provincia por un importe global de 76.580 euros. Os concellos beneficiarios son Chantada, Viveiro, Palas de Rei, Monforte de Lemos, Alfoz, Mondoñedo, Pol, Triacastela, Guitiriz, Outeiro de Rei, Ribadeo, Xermade, Quiroga, Xove e Trabada.

Por último, na liña de promoción da igualdade e prevención da violencia de xénero a contía das subvencións é de 12.300 euros que chegarán a tres concellos: Guitiriz, Monforte de Lemos e Xove. Ao abeiro desta liña, fináncianse accións de intervención de carácter integral coas mulleres que sofren este tipo de violencia, os seus fillos e fillas e as súas persoas dependentes; así como actuacións dirixidas á loita contra a explotación sexual e a prostitución.

Así mesmo, a secretaria xeral da Igualdade sinalou que ante a alta demanda, a Xunta vai ampliar en case 260.000 euros o orzamento destinado ás iniciativas para conciliar a vida laboral, persoal e familiar e ao programa de apoio aos Centros de Información ás Mulleres co obxectivo de atender á totalidade dos expedientes que cumpren todos os requisitos para a concesión das axudas. No que atinxe á provincia de Lugo, segundo avanzou, a dita ampliación permitirá financiar os programas de conciliación presentados polos concellos de Baralla, Pol e Taboada.

Conciliación en Palas de Rei co programa ‘Xogando en vacacións’
Susana López Abella, acompañada de Balseiro e do alcalde de Palas de Rei, Pablo Taboada, visitou tamén esta mañá o programa de conciliación “Xogando en vacacións” do Concello de Palas de Rei. A actividade consiste nunha serie de obradoiros escolares para nenos e nenas de entre 3 e 12 anos que se desenvolven durante as vacacións. A maioría deles pertencen o medio rural, a parroquias moi pouco poboadas. O sistema de selección é segundo un criterio de ingresos per cápita das familias.

Os participantes forman parte de 55 familias do concello e a organización, xestión e seguimento da actividade serán levadas pola directora do Centro de Información á Muller, Divina Agra. Mediante esta acción, faise posible que as familias poidan facer fronte a época de vacacións para os máis cativos, pero laboral para os pais e nais. Ademais, a medida comprométese a dar prioridade ós veciños con menos recursos.

As actividades, que veñen realizándose dende 2018, estarán subvencionadas con fondos da Xunta de Galicia: tanto para os custos de persoal como para a compra de material. Cinco serán as persoas (dous mestres, un pedagogo e dous monitores de tempo libre) encargadas da realización dos talleres e obradoiros.