“Despois de oitenta días de silencio institucional, o alcalde de Cervo dígnase por fin a convocar á corporación municipal a un pleno ordinario”, denuncia o BNG

 Cervo, 27 de maio de 2020. Os concelleiros do BNG en Cervo criticaron “o secuestro institucional executado polo alcalde do PP en Cervo, Alfonso Villares, que foi incapaz de convocar ningunha xunta de portavoces, ningún pleno, e nin sequera efectuou unha soa chamada telefónica nos últimos oitenta días, tampouco cando saltou a noticia dos positivos por coronavirus na residencia da terceira idade de San Cibrao”. Diego Fernández, afirmou que “o BNG foi moi respectuoso e deu a súa confianza ao goberno local nun contexto tan grave como o actual”, mais despois de dar un tempo prudencial ao alcalde para adaptarse á situación, e constatar como Villares fixo caso omiso ás peticións para celebrar algunha Xunta de Portavoces de carácter informativo, acusouno de “non respectar á veciñanza que representamos e actuar como se dunha ditadura se tratase, de facer e desfacer ao seu antollo sen ningún tipo de respecto institucional e democrático coa corporación”.

Moción de apoio ao mantemento do emprego nas empresas auxiliares de Alcoa
O BNG defenderá unha moción de apoio aos traballadores afectados por ERTE nas empresas auxiliares da multinacional Alcoa, Reymogasa e Cyrgasa promovida pola Plataforma Coordinadora das Empresas Auxiliares de Alcoa. Diego Fernández, portavoz municipal e traballador dunha delas, “reclamou tanto ao PSOE como ao PP no goberno do Estado e na Xunta de Galiza, que asuman responsabilidades e cumpran co prometido”. O nacionalista lembrou que “o PSOE ten un acordo para a investidura de Pedro Sánchez asinado co BNG no que se comprometeron a aprobar un estatuto para a industria electrointensiva que segue pendente, e o PP non pode evadirse botando balóns cara Madrid sen esixirlle á multinacional que revirta a decisión de deixar de investir e de pechar de cubas, ao tempo que recibe contiosas axudas públicas”. Diego Fernández e Xorxe Caldeiro afirmaron que “hai moitos postos de traballo en xogo agardando solucións, é hora de que tanto PSOE coma PP deixen de tirarse trastos á cabeza e acheguen solucións xa que esa é a súa función como gobernantes en Santiago e en Madrid”.
Moción para a elaboración dun Plan Galego para a Reactivación Económica
Nesta moción, a formación nacionalista reclama medidas para evitar que a crise económica derivada da pandemia do Covid-19 a acaben pagando, como xa sucedeu na crise de 2008, as clases populares e máis desfavorecidas. Con este fin, e tendo en conta que as administracións locais non teñen competencias estruturais en materia fiscal, Diego Fernández e Xorxe Caldeiro defenderán unha iniciativa na que solicitan dúas accións: primeiro, que o concello se dirixa á Xunta de Galiza para pedir a elaboración dun plan galego de reactivación económica, consensuado con todas as administracións, forzas políticas, axentes e sectores sociais. E segundo, reclamar ao goberno do Estado a derrogación da lei de Orgánica 2/2012, de 27 de abril, de estabilidade orzamentaria e sostibilidade financeira (a chamada Lei Montoro), que lle impide ás administración locais asumir investimentos de carácter social, e por tanto ser útiles para evitar a exclusión social. Diego Fernández e Xorxe Caldeiro lembraron que esta lei deriva da modificación exprés do artigo 135 da Constitución, acordado no ano 2011 por PSOE e PP.

Moción sobre a lingua galega

Co gallo da recente celebración do Día das Letras Galegas, o BNG leva a pleno a preocupación pola perda do uso do idioma propio de Galiza. Para a formación nacionalista a política lingüística emprendida polo actual goberno galego non vai na dirección correcta, tal e como demostran os diferentes estudos realizados polo Consello da Cultura Galega (CCG) e a Real Academia Galega (RAG) en relación á lingua galega.

Entre outros puntos de acordo, Diego Fernández e Xorxe Caldeiro, defenderán instar á Xunta de Galiza a que adopte medidas económicas extraordinarias para apoiar o sector da cultura e do Libro en galego. Así, pedirán derrogar o Decreto 79/2010 do 20 de maio, para o plurilingüismo no ensino non universitario de Galiza e tamén elaborar un novo marco lexislativo que conte co consenso das forzas políticas do Parlamento galego. Ademais, instarán á Xunta de Galiza a restituír o orzamento recortado durante os últimos anos, incrementando as partidas dirixidas á defensa e promoción da lingua galega e tamén as necesarias para implementar a Lei Paz Andrade, ou reclamar do Concello de Cervo a realización de campañas de dinamización lingüística e promoción do uso da lingua galega, especialmente aquelas que teñan especial incidencia na infancia e a mocidade.