O GDR Terras de Miranda e a Asociación A Sucadoira promocionan o consumo de produtos de proximidade entre os escolares de Ribadeo

Mondoñedo, 13 de decembro de 2021. O Grupo de Desenvolvemento Rural (GDR) Terras de Miranda e a Asociación de produtores e produtoras de horta A Sucadoira visitaron o luns 13 de decembro o Colexio Sagrado Corazón de Jesús (Ribadeo), para trasladarlles aos escolares a importancia de consumir produtos de proximidade e o camiño que estes percorren dende que son sementados ata que chegan aos seus fogares.

Esta xornada de sensibilización enmárcase dentro do proxecto piloto no que o GDR Terras de Miranda e a Asociación A Sucadoira colaboran con obxectivo de valorizar, promocionar e distribuír os produtos da horta e a súa excelente calidade, así como o recoñecemento social do traballo das produtoras e produtores locais.

Produtoras da asociación comezaron a xornada contándolle ao alumnado do colexio o obxectivo da súa asociación e as súas motivacións. As produtoras falaron da importancia que ten o consumo de produtos de proximidade para a sostibilidade social e medioambiental do territorio. Os escolares puideron aprender cales son os produtos que cultivan as produtoras e produtores da asociación, así como as diferentes tempadas de produción e recollida. Algúns deles probaron a sementar produtos da horta e froitas que agora terán que coidar entre todos nas súas aulas.

Puideron desfrutar desta actividade os alumnos de terceiro, cuarto, quinto e sexto de educación primaria. O vindeiro xoves día 16 desfrutarán desta xornada o alumnado do CEIP Gregorio Sanz.