Pescados Rubén Burela e Alberto Riquer acordan a súa non continuidade ó fronte do equipo

Burela, 21 de marzo, 2022. O Pescados Rubén Burela e Alberto Riquer Antón chegaron a un acordo para separar os seus camiños, o ata o de agora técnico laranxa do equipo masculino de Primeira División xa non se desprazará a Tudela para a xornada 20 de Liga que se disputa mañá en Navarra.

Riquer fíxose cargo do conxunto burelista esta tempada e demostrou a súa profesionalidade “desde o primeiro día, cuns valores e ética de traballo incuestionables pero lamentablemente os resultados non foron os esperados polo que ambas partes vémonos obrigados a tomar unha decisión dolorosa pero necesaria para tentar variar a dinámica do equipo” comentou Manuel Blanco, presidente do Pescados Rubén Burela. O máximo dirixente burelista destacou “a comprensión e elegancia por parte de Riquer con esta decisión. Agradecemos as facilidades para chegar a un acordo rápido. Váisenos un cabaleiro do deporte”.

Pola súa banda, Riquer manifestou o seu desexo de que “con este cambio o equipo consiga romper a dinámica actual de resultados, é unha decisión consensuada que espero que sexa positiva para o equipo”. En relación ao traballo e predisposición dos xogadores “voume agradecido xa que desde o principio de tempada adestramos con profesionalidade e competindo con orgullo. Non saíu como todos esperabamos e asumo a miña responsabilidade”. O técnico madrileño despídese da entidade burelense agradecendo “ao club e a directiva a súa disposición para poder realizar o meu labor á fronte do equipo. Traballei a gusto e lamento que os resultados non fosen os esperados”. Riquer fixo extensible o seu agradecemento “á afección polo seu apoio durante estes meses.
Xogamos para eles e aínda que non tivemos bos resultados si espero que se sentiran identificados co esforzo e compromiso do equipo”.