smart
A Mariña, 2 de marzo de 2023. Do 11 de marzo ao 23 de abril desenvolveranse na Mariña Lucense oito xornadas de turismo slow, que terán lugar en Ourol, A Pontenova, Cervo, Foz, Xove, Ribadeo e Viveiro.
O Turismo Slow Norte de Galicia é un proxecto colaborativo posto en marcha no ano 2015 polas Mancomunidades de Concellos da Mariña Lucense e Ferrolterra – Rías Altas, coa intención de promover un turismo sostible, é dicir, respectuoso coa natureza, coa xente que vive no territorio, coas empresas e traballadores do sector turístico. Así, con esta filosofía, que hoxe en día xa é tendencia, foise desenvolvendo un proxecto escaparate da oferta de ambos xeodestinos para dar resposta ao perfil do turista que escapa das masificacións e que está cada vez máis concienciado cunha forma de viaxar máis pausada, buscando o descanso, gozando do medio natural e coñecendo e valorando a cultura e a vida local.
O presidente da Mancomunidade, Fran Cajoto, lembrou que “no 2020 deseñáronse da man dos aloxamentos e empresas provedoras de actividades unha serie de experiencias de turismo slow que se poden ver na web deste proxecto (turismoslow.gal) e este pasado outono saíu un pequeno programa piloto de 6 actividades, xa que unha das premisas do proxecto, e en concreto desta iniciativa, é o interese por desenvolver este tipo de xornadas relacionadas coa natureza, a gastronomía e a cultura local en temporada baixa, e axudar así na desestacionalización da actividade turística e no desfrute máis pausado de todas elas”.
Cajoto Caserío subliñou que “por iso e trala proba piloto no outono sae agora un novo programa de cara á primavera, de 8 actividades, para desenvolver entre os meses de marzo e abril. As propostas buscan o equilibrio persoal en contacto coa natureza, así como achegar ao visitante á cultura local e aos recursos turísticos e outras son de nova creación con motivo deste programa de primavera”.
O presidente da Mancomunidade indicou que “as actuacións a desenvolver entre marzo e abril no marco do proxecto Experiencias de Turismo Slow correspóndense con 8 propostas dirixidas a distintos públicos que se organizarán en xornadas de 1 día ou de fin de semana do 11 de marzo ao 23 de abril”.
As Experiencias de Turismo Slow arrincarán o 11 de marzo en Viveiro e na Pontenova. Na cidade do Landro desenvolverase un obradoiro de pan no que Panadería Galdo compartirá a experiencia de facer pan de forma totalmente artesanal nun forno de leña do ano 1961 e no que a xente poderá levar para a casa o pan feito coas súas propias mans. E na Pontenova haberá unha ruta guiada polo seu patrimonio industrial e cultural, ofrecendo o coñecemento sobre a función dos fornos que son a imaxe máis recoñecible da vila, unha visita á Mina Consuelo e o descenso na tirolesa da man de Tirolina das Minas, coa posibilidade de ampliar a experiencia cunha estancia en Casona de Labrada.
O 18 de marzo terá lugar un brunch con degustación de marmeladas en A Morena, un obradoiro situado en Sargadelos (Cervo), que elabora marmeladas artesanais elaboradas con ingredientes ecolóxicos e de primeira calidade. E ese mesmo día Os Tres Teixos en San Acisclo (Foz) ofrece unha estancia especial para recibir e celebrar o Equinoccio de primavera cun programa de actividades compartidas coma mindfulness, yoga, danza ou paseos conscientes.
O 25 de marzo están programadas dúas actividades moi diferentes. Por un lado o carpinteiro francés Sebástien Léprevost ofrecerá un obradoiro para coñecer todo o ciclo da madeira e fabricar unha pequena peza no seu taller de Ourol e, por outro Roqsport ofrece vivir unha experiencia diferente en familia e en plena natureza no seu Parque de Aventura de Viveiro, onde se poderán realizar os distintos circuítos de diferentes dificultades entre árbores atravesando pontes, pasarelas, tirolinas, etc e un percorrido de orientación con explicacións sobre o manexo do compás, interpretación de mapas, etc.
Xa en abril, despois da Semana Santa, o día 15 en Ribadeo Raíces Nómadas Atelier ofrece un obradoiro para aprender as técnicas básicas da marroquinería fina; coser a man, acabado de bordes e todo o preciso para que cada asistente elabore o seu propio bolso e o leve acabado. Coa posibilidade de ampliar a experiencia cunha estancia na Cortiña de Cantalarrana.
E o 22 e 23 de abril no Lugar das Marías en Xove, Iria Pigueiras ofrecerá un taller de iniciación á cerámica para coñecer de primeira man diferentes técnicas, materiais, texturas e pigmentos así como crear varias pezas deseñadas por cada asistente seguindo un proceso creativo dinámico e colaborativo, nun entorno excepcional como é a aldea e o xardín deste aloxamento. A experiencia inclúe merenda, pernoita, cea e almorzo.
As actuacións vinculadas a esta iniciativa, que teñen que ver principalmente coa coordinación e promoción do programa, están financiadas ao abeiro do Plan de Sostibilidade Turística na Mariña Lucense, co financiado pola Mancomunidade de Concellos da Mariña Lucense, a Xunta de Galicia e a Secretaría de Estado de Turismo en colaboración coa Deputación de Lugo.
Expectativas de futuro
O Turismo Slow Norte de Galicia é un proxecto de participación voluntaria para aquelas empresas de aloxamento que cumpran os requisitos e, sobre todo, que teñan a motivación e ilusión necesarias para participar nun proxecto colectivo deste tipo e que fagan un triplo compromiso: o ambiental, de sustentabilidade e coidado do entorno; coa calidade dos aloxamentos e a profesionalidade das persoas responsables; e co proxecto, que se refire á implicación e o interese pola consolidación do mesmo.
Na actualidade, participan no Turismo Slow Norte de Galicia un total de 52 aloxamentos, dos que 24 pertencen ao xeodestino de Ferrolterra Rías Altas e 28 ao xeodestino Mariña Lucense. Nestes anos, nos que a pandemia puxo de manifesto a importancia da relación co medio natural, os aloxamentos turísticos viron incrementadas as estancias medias das persoas aloxadas. Nestes últimos dous anos, o proxecto está incorporando á oferta tamén produtores e empresas de actividades que complementan as visitas turísticas. Desta idea das experiencias slow é de onde naceu este programa que se presenta agora.
Subliñou o traballo colectivo, o papel do voluntariado e a participación de arredor de mil corredores. Tamén puxo en valor o impacto económico e social da proba e o apoio institucional que permite o seu crecemento, incluída a difusión en streaming que levou a CAMOVI e a Viveiro a todo o mundo.
O presidente, José Manuel Gómez Puente, destacou o bo tempo e o reencontro do grupo nun percorrido de 22 km entre Pedrafita e Triacastela. A próxima etapa será o 1 de maio, entre Triacastela e Sarria, e xa está aberta a inscrición no teléfono 623 22 68 25.
Ás doce en punto, tres foguetes —un por cada palabra do nome oficial— foron lanzados desde O Castrodouro, capital histórica do termo municipal e orixe da localidade, pois alí, hai 806 anos, Afonso IX concedeu o título de vila e todo un distrito que administrar; episodio histórico do que deriva o nome do concello. Os veciños reunidos mostraron a súa satisfacción pola recuperación da denominación histórica, afirmando moitos deles que nunca deixaran de empregar o nome completo. Do mesmo xeito, os maiores agradeceron aos impulsores da iniciativa a restitución do topónimo que a historia legou ao municipio alfocés.
Viveiro, 20 de abril, 2026. A proba volveu converter Viveiro nun punto destacado do deporte e da convivencia, ademais de supoñer un impulso económico para o municipio. María Loureiro destacou que a Camovi “é un exemplo de colaboración e esforzo colectivo, que sitúa Viveiro no mapa e dinamiza a economía local”. O Partido Socialista lembra o seu apoio histórico á carreira e reafirma o seu compromiso para seguir contribuíndo ao seu crecemento. O PSOE agradece tamén á veciñanza a súa acollida e implicación, fundamentais para que o evento continúe medrando ano tras ano.
Castro destacou o labor da Asociación e o potencial da tradición do ferro como motor económico, social e cultural para Riotorto, subliñando a importancia de impulsar iniciativas que garantan futuro para estes oficios. A Deputación de Lugo mantén unha colaboración estable coa entidade, cunha achega de 14.000 euros. No marco deste apoio, a Asociación avanzou na documentación dos oficios do ferro, catalogando ferramentas, técnicas e a historia das antigas “ferrerías de monte”.
O responsable provincial destacou "o traballo realizado pola organización ao longo destes anos para consolidar unha proba deportiva de primeiro nivel, que atrae tanto deportistas do máximo nivel competitivo como participación popular"
