Por Viveiro pide a reparación inmediata das fochancas da explanada da variante

Viveiro, 18 de novembro, 2023. O pasado 17 de xullo de 2023 anunciábase nos medios de comunicación locais, que a coñecida como explanada da variante pasaba a ser titularidade municipal, logo de anos de enfrontamentos entre o Concello e Costas do Estado sobre a zona.

Isto suporía unha reparación inmediata da zona para que os veciños despois de anos de espera puideran ver a explanada reparada e urbanizada correctamente.

Se ben o lóxico sería pensar que o Concello tería un proxecto elaborado previamente para reparar a zona mediante acordo cos dous promotores dos edificios, que serán os encargados de sufragar a maioría das obras, resulta que iso non existia no momento de cesión dos terreos por parte de Costas.

Pasaron xa 4 meses da cesión dos terreos, e salvo tapar as fochancas con zahorra, as cales por certo, volven a estar igual, nada se sabe do proxecto nin do acordo cos promotores. Outro inverno máis que as veciñas e veciños van pasar entre fochancas.

“É por iso que Rogamos ao Equipo de Goberno, que informe a este Pleno da Corporación Municipal, de cales foron as reunións mantidas cos dous Promotores, cantas e en que datas se levaron a cabo, en que estado se atopa o proxecto de execución e cal é o prazo previsto para o inicio das obras”.