As novas obras de mellora na rede de Pomeda, cun importe de 40.000€, súmanse a unha serie de actuacións neste sentido en todo o municipio
Burela, 28 de agosto de 2024. O Concello de Burela vén de rematar unha obra de mellora da rede de abastecemento de Pomeda por un importe de preto de 40.000€, que se suma a outras actuacións realizadas neste sentido en todo o municipio.
“Trátase dunha obra moi necesaria polos problemas de falla de presión previamente existentes, e permitirá que o funcionamento desta rede sexa óptimo”, explica o concelleiro de Obras, Ramiro Fernández Rey.
“Temos feito obras por un valor total de máis de 200.000€, que aínda que non sexan moi visibles, son de grande importancia para o futuro da vila”, destaca o edil.
Previamente tamén se realizaron nos ultimos meses “actuacións no abastecemento e o saneamento na rúa do Río Sil, por un importe de 42.000€, ou no saneamento na rúa Camiño Real cun custo de 34.000€”, enumera.
“Tamén actuamos no saneamento da zona de Vilastrofe por 26.000€, no Camiño do Cancelo por 28.000€, e nos depósitos da auga de Luis Seone con melloras por valor de 42.000€”, engade.
“Melloramos así mesmo o telecontrol na estación depuradora por un importe de 42.000€, un investimento que se poderá aproveitar cando, en breves, se faga a nova depuradora”, apunta Fernández Rey.
O concelleiro afirma que “a mellora da rede de saneamento e da rede de abastecemento de Burela é un tema moi importante para o Goberno local, non só para ofrecer o mellor servizo posible á veciñanza, senón tamén para evitar ao máximo as fugas de auga”.
“Aínda que somos un Concello que se atopa entre os máis punteiros en canto a eficiencia da rede, atopándonos arredor do 90% de eficiencia, seguimos investindo neste sentido para que o funcionamento destes servizos sexa o mellor posible”, subliña.
“Quedan máis obras que facer, pero estes 200.000€ demostran o compromiso deste equipo de Goberno nun tema tan importante e tan valorado pola veciñanza, de cara a evitar os problemas de auga que se deron nos concellos da nosa contorna”, conclúe o edil.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
