Villares sinala como estratéxico afondar na promoción dos produtos pesqueiros entre a mocidade para influir nos hábitos de consumo do futuro

O responsable autonómico pon en valor a campaña promovida por Anfaco-Cecopesca, co apoio da Consellería do Mar, que desprazará unha foodtruck polos campus universitarios ofrecendo degustacións gratuítas de conservas de peixes e mariscos

Santiago de Compostela, 16 de setembro de 2024. O sector pesqueiro galego continúa redobrando esforzos da promoción dos produtos pesqueiros como resposta ao progresivo descenso do consumo destes alimentos entre a cidadanía. Neste contexto, o conselleiro do Mar, Alfonso Villares, participou xunto co secretario xeral de Anfaco-Cecopesca, Roberto Alonso, na presentación da nova campaña promovida por esta entidade, ‘A Matriculata’, que levará ata o vindeiro 23 de setembro, a través dunha foodtruck, o mellor sabor das conservas de peixe e marisco polos principais campus universitarios galegos.

Esta iniciativa desenvólvese no marco do convenio de colaboración desta entidade coa Conselleria do Mar para a promoción e mellora da comercialización das conservas e produtos pesqueiros para o ano 2024, cofinanciado polo Fondo Europeo Marítimo de Pesca e Acuicultura (Fempa). Segundo explicou Alonso o obxectivo é concienciar á mocidade sobre a importancia dunha alimentación saudable, destacando as propiedades nutricionais das conservas de peixe e marisco así como as posibilidades que presentan estes alimentos á hora de realizar pratos rápidos e nutritivos.

Pola súa banda, o responsable autonómico enmarcou esta nova acción no marco do compromiso do Goberno galego en afondar na promoción dos produtos do mar galegos, destacando iniciativas como O Sabor da Aventura está no Mar, Ti si que eres un bo peixe, Ponlle as pilas ao teu bocata ou Fai click ao teu bocata, que van dirixidas ao público máis novo. Nesta liña subliñou a importancia de influír nos hábitos de consumo das novas xeracións como mellor estratexia para acadar unha cidadanía máis saudable e reverter a tendencia negativa da presenza destes alimentos na cesta da compra dos consumidores.

Tamén resaltou que nesta tarefa débense involucrar todos os axentes implicados para acometela con éxito e, nese sentido, valorou moi positivamente esta nova campaña que susténtase na garantía dunha saúde pública de excelencia baseada nunha educación nutricional óptima. Para iso, xogan un papel moi relevante os expertos gastronómicos de ampla experiencia e recoñecemento como Alberto Ribas e Chema García que compartirán os mellores consellos e trucos cos estudantes, dando un maior valor se cabe a esta iniciativa, achegando tamén á xuventude a labor da industria pesqueira galega.

Un sector estratéxico

O conselleiro destacou a importancia social e económica do sector da conserva na comunidade da que Anfaco-Cecopesca é unha ampla representante xa que agrupa a máis de 250 empresas do complexo mar industria de toda España cunha facturación que superou os 12.100 millóns de euros no 2022. As compañías galegas representan máis da metade dos asociados, o 88% da facturación e o 75% do emprego, xerando en Galicia máis de 11.200 postos de traballo, sendo ocupados o 65% por mulleres.

Unha relevancia que está reflectida no Plan Estratéxico para o Sector Conserveiro 2022-2030 que recolle máis 80 medidas que abarcan sete liñas de acción apostando polo reforzo da solvencia empresarial e a capacidade de investimento, a optimización dos procesos produtivos ou internacionalización así como na dixitalización e uso de novas tecnoloxías co obxectivo de xerar un maior valor engadido.

Promoción e IVE

Alfonso Villares instou ao Goberno central a dar un paso adiante na promoción dos alimentos mariños a nivel estatal, en liña coas accións promovidas desde a Xunta, así como a acceder a rebaixar o IVE a estes produtos. Dúas demandas nas que se leva insistindo no conxunto da cadea mar-industria como ferramentas máis eficaces para incentivar o consumo do peixe, marisco e conservas sen atopar, ata agora, resposta satisfactoria por parte do Ministerio de Agricultura, Pesca e Alimentación.