Tamén sinalou o incremento do sistema de dependencia e os esforzos do Goberno por incrementar a seguridade dos maiores para garantir un envellecemento pleno e activo
Lugo, 1 de outubro de 2024. A subdelegada do Goberno en Lugo, Isabel Rodríguez, destacou esta mañá con motivo do Día Internacional das Persoas Maiores a importancia de garantir un envellecemento activo e saudable, subliñando as políticas impulsadas polo Goberno en favor desta parte fundamental da sociedade. Durante a conferencia impartida polo formador, organizado polo Concello de Lugo a través da área de Benestar Social e Maiores, dirixido por Olga López Racamonde, e en colaboración coa Policía Nacional, a subdelegada puxo en valor as medidas adoptadas polo Goberno nos últimos anos para mellorar a vida das persoas de avanzada idade.
Un dos puntos principais mencionados pola subdelegada na súa intervención foi o incremento do 8,5% nas pensións (un 3,8% no último ano) que beneficiou a máis de 114.000 persoas maiores na provincia de Lugo, asegurando unha mellora nas súas condicións de vida. Ademais, destacou o reforzo do sistema de dependencia, que experimentou un aumento do 152% desde o ano 2018, proporcionando un maior apoio a aqueles que necesitan asistencia nesta etapa vital. “Estas políticas son unha mostra do compromiso do Goberno de Pedro Sánchez coa protección das persoas maiores”, remarcou.
Ademais, salientou a necesidade de non concibir a vellez como un período de declive, senón como unha etapa na que se deben promover a calidade de vida, a seguridade e o benestar. Segundo indicou, “é fundamental fomentar a participación activa das persoas maiores na sociedade, asegurando que poidan gozar dun envellecemento saudable e pleno”. O Goberno traballa para garantir que as persoas maiores dispoñan dos recursos e servizos necesarios para manterse activas e seguras na súa vida diaria.
Colaboración institucional
Na súa alocución, a subdelegada tamén destacou o traballo conxunto entre as institucións, como o programa do Plan Director da Policía Nacional, que ofrece formación a persoas maiores para previr situacións de risco, tales como estafas ou abusos. “Estas charlas formativas, como a impartida nesta ocasión por Rubén Darío Vega, formador da Policía Nacional, son fundamentais para reducir a vulnerabilidade das persoas maiores nunha contorna cada vez máis complexa”. A subdelegada eloxiou a colaboración institucional na protección e seguridade deste colectivo.
Nas súas palabras de peche, a subdelegada insistiu en que o Goberno seguirá traballando para mellorar a vida das persoas maiores, combatendo problemas como a soidade e asegurando un envellecemento digno, activo e protexido para todos.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
