As burelistas foron superiores a un voluntarioso conxunto manchego, pero non lograron sentenciar a eliminatoria ata o segundo tempo grazas á gran actuación da meta local Vera
Burela, 18 de decembro, 2024. O Burela FS cumpriu cos prognósticos derrotando a domicilio (0-4) ao Almagro FSF, de Segunda División, e estará na final a 8 da Copa da Raíña, que se celebrará entre o 2 e o 4 de maio de 2025 nunha sede aínda por determinar e onde buscará o seu sétimo título copeiro. As mariñás dominaron todo o encontro, pero tiveron que esperar á segunda parte para sentenciar grazas á gran actuación durante o primeiro período da porteira local Vera. Ourense Ontime, STV Roldán, Castro Bloques Cando, Torreblanca Melilla, Gran Canaria Teldeportivo, Poio Pescamar e MRB Móstoles son os outros equipos que loitarán polo título coas da Mariña na fase final.
As discípulas de Julio Delgado presentáronse en terras manchegas coa firme intención de non especular e decantar o partido do seu lado canto antes. Con todo, as paradas de Vera provocaron que as laranxas non anotasen o primeiro tanto ata o minuto 18 de xogo. Os primeiros intentos chegaron nos pés de Emilly, no primeiro minuto de xogo, e Dany, no quinto, nunha acción na que entre a gardameta local e Sofía Valero evitaban que o balón se coase na portería ciudadrealeña.
As encaixeiras responderon no minuto 6, nunha perda de Carolina Pedreira que finalizou cun disparo de Elena e a parada salvadora de Caridad, que volvería intervir á saída do córner posterior nun disparo de Rebeca Culebras. Foi un pequeno espellismo, xa que pronto regresaron as ocasións para as Pícaras, que volveron probar a Vera nunha dobre ocasión de Dany, con senllas paradas milagrosas; cun disparo de Patricia; unha volea de Emilly e outro remate afastado da brasileira na que a meta volvía meter as mans. Entremedias, Cris Lourés atopouse co pau nunha acción a balón parado. Pouco despois, xa no minuto 16 aparecía de novo a cancerbeira local para sacar un remate de Dinha tras unha boa deixada de Dany.
O primeiro tanto para as visitantes estaba merodeando e por fin chegaría no minuto 17, cando Carolina remataba a pracer no segundo pau un gran servizo de Dinha tras unha bonita parede con Patricia. As mariñás atopaban o premio ao seu dominio antes do descanso, pero a punto estiveron de irse con empate a vestiarios, xa que a dous segundos do intervalo era Caridad a que aparecía para frustrar un man a man de Elena. A de Sanlúcar ía moi ben abaixo para evitar o tanto almagreño.
No segundo tempo non cambiou demasiado a decoración, cun Burela FS dominador, aínda que si baixou moito o ritmo e as ocasións en ambas as porterías. Emilly atopábase co pau no segundo minuto da continuación e dous goles en apenas un minuto sentenciaban definitivamente a eliminatoria. May Moncayo metía o balón na súa propia portería no minuto 23, tras unha boa acción de Patricia pola á esquerda, e segundos máis tarde era Cami a que non perdoaba aproveitando un rexeite de Vera tras un disparo da futbolista yeclana.
Cun Almagro ao que xa lle custaba moito saír do seu propio campo, Dany tivo o cuarto no minuto 27, pero non puido concretar ante Vera e si o faría oito minutos máis tarde nun remate por baixo tras unha perda en primeira liña das encaixeiras. As de Ciudad Real probárono con Alba Peña como porteira-xogadora no últimos cinco minutos, pero apenas foron capaces de xerar perigo sobre o marco de Caridad.
Con este triunfo pon fin o conxunto feminino do Burela FS a un produtivo ano 2024 que pecha coa obtención dos títulos de Liga e Supercopa. O primeiro partido das de Julio Delgado en 2025 será o 4 de xaneiro nas Illas Canarias. Mediranse ao Gran Canaria Teldeportivo nun encontro pertencente á última xornada da primeira volta.
Ficha Técnica Almagro FSF 0-4 CD Burela FS
Almagro FSF (0): Vera; Ventoso, Rebeca Culebras, Sofía Valero, May Moncayo -quinteto inicial-, Alba Peña, Elena Dávila, Raquel Abellán, Elena, Eva Palma e Nerea (ps).
CD Burela FS (4): Caridad; Cami, Dinha, Emilly, Patricia -quinteto inicial-, Carolina Pedreira, Dany, Noelia Montoro, Cilene, Débora e Cris Lourés.
Goles: 0-1, min. 18: Dinha. 0-2, min. 23: May Moncayo (p.p.). 0-3, min. 24: Cami. 0-4, min. 35: Dany.
Árbitros: Alberto Carrión Álvarez e Noelia Gutiérrez Muñoz (Colexio de Castilla-La Mancha). Amoestaron á burelista Dany.
Incidencias: Encontro dos oitavos de final da Copa da Raíña disputado no pavillón Gemma Arenas de Almagro diante duns 600 espectadores. Nos prolegómenos do partido gardouse un minuto de silencio pola morte dun tío da xogadora local Elena Dávila.
En total foron ofertadas preto de 80 prazas de surf, piragüismo e vela, destinadas a nenas e nenos con idades comprendidas entre os 9 e os 15 anos. As escolas desenvolvéronse en diferentes quendas nos meses de xuño e xullo. O concelleiro de Deportes, Francisco José Silvent, subliñou “a importante participación da rapazada ribadense nas escolas deportivas de verán, que organizamos desde o Concello de Ribadeo coa axuda dos clubs que as impartiron. Queremos agradecer ás familias a confianza depositada nas nosas actividades, que lles serviron aos asistentes para practicar deporte na auga e para pasar uns días aprendendo e perfeccionando técnicas”.
No encontro mantido na sede da delegación territorial da Xunta en Lugo, no que tamén estivo o director territorial da Consellería, Marco Antonio Fernández Piñeiro. abordáronse liñas de cooperación para a mellora de Infraestruturas e de seguridade viaria, de interese para este municipio. O departamento que dirixe M. Allegue segue prestando apoio aos municipios para executar actuacións que contribúan a mellorar a calidade de vida da veciñanza e a reforzar a competitividade económica.
Xa se poden ver auténticas "artistadas", todas coas serea como protagonista, enchendo o ambiente desa creatividade tan propia da celebración.
O corte estará vixente entre as 00:00 e as 05:00 horas da madrugada do venres 7 ao sábado 8 de agosto, co obxectivo de garantir a seguridade das persoas asistentes e o correcto desenvolvemento do evento, que terá lugar nos Xardíns Noriega Varela. Desde o Concello de Viveiro solicítase a colaboración da veciñanza e das persoas condutoras, recomendando planificar os desprazamentos con antelación e utilizar itinerarios alternativos durante o tempo que permaneza vixente esta restrición.
Os deslizadores acuáticos enchen de diversión a praia dos Bloques. Onte, martes, estiveron operativos pola tarde e hoxe, mañá e o venres estarán dispoñibles de 11:30 a 14:00 horas e de 16:00 a 19:30 horas. O concelleiro de Deportes, Francisco José Silvent, anima á rapazada “a achegarse á praia dos Bloques a gozar das actividades de verán que deseñamos desde o Concello. Hóuboas para todos os gustos e idades tanto na pista multideporte como na praia dos Bloques. Agardamos que disfruten estes días cos deslizadores acuáticos, xogando e pasando un mes de agosto o máis divertido posible”.
A mostra sobre Mimina, que repasa a súa traxectoria vital e artística e o seu papel esencial na creación de Sargadelos como empresa cultural, amplía o seu período de apertura até o 12 de agosto grazas á cesión das instalacións por parte do Concello de Cervo. A exposición poderá visitarse todos os días de 12:00 a 14:00 e de 17:00 a 20:00, e tamén se poden concertar visitas noutros horarios ou para grupos chamando ao 636020514 (Lucía).
No Campo de Fútbol de As Valgas poderanse ver desde as 21.30 horas as actuacións de Netos de Bandim, chegados desde Guinea Bissau; da Philippine Performing Arts Company, das Filipinas; e do grupo anfitrión O Arco da Vella. Un encontro único de culturas, ritmos e emocións que promete unha noite inesquecible.
