Hoxe é Mércores de Cinza. Nunha sociedade de signos, onde estes son tan importantes, a comunidade cristiá comeza cun xesto que é, á vez, persoal e comunitario. Sobre as nosas cabezas derramamos un pouco de cinza como un signo externo que nos visibiliza simultaneamente nun desexo e sentimento interior: somos fráxiles e pecadores, necesitamos a conversión, é fermoso saborear de novo a misericordia restauradora de Deus. O xesto da cinza expresa todas estas claves, acollendo así a tradición ancestral de tantas tradicións relixiosas que se botaban cinza como signo penitencial.
Os cristiáns comezamos con este xesto un camiño que nos conduce á Pascua. Tras o entroido, que encheu de actividades as nosas rúas e prazas, o xesto da cinza convídanos a meternos na difícil interioridade e poñernos ante o espello da pregunta sobre quen son. Recoñecemos que é máis sinxela a extroversión que a aventura de crecer interiormente, aínda que o necesitamos como a choiva. Vivimos nunha sociedade que dificulta crecer interiormente e, consecuentemente, abócanos a sentirnos ocos, baleiros, deshabitados.
Nese percorrido coresmal que conclúe na Pascua convídasenos fundamentalmente a mirarnos cara a dentro cunha nova luz: e, desta maneira, descubrímonos amados, chamados, habitados, convidados á vida en plenitude, enviados. Percibirse así transforma a vida, a chea de sentido e de esperanza, descóbrea plena e gozosa. Así sente o corazón do cristián cando percorreu este longo camiñar e ábrese a gozar coa aurora do domingo da Pascua.
O signo da cinza vai acompañado tradicionalmente dalgunhas prácticas que o reforzan e o enchen de sentido. A oración axúdanos a que a nosa interioridade non se converta nun ensimesmamento pietista que nos narcotice, senón que se converte nun diálogo e encontro co outro que nos coñece, nos acompaña, nos guía e nos desborda. O xaxún convídanos a renunciar ao superfluo e ao que nos degrada, para ser e percorrer os camiños da auténtica liberdade que nos plenifica. A esmola ábrenos aos necesitados, espertando a nosa mirada con aqueles con quen diariamente compartimos a nosa existencia, repartindo os nosos bens e a nosa vida na construción dun mundo máis fraterno e humano.
Son estas prácticas tradicionais, máis modernas do que habitualmente pensamos, as que nos permiten avivar a nosa esperanza e xerar camiños de auténtica esperanza. Esa esperanza que tanto necesitamos e que se enraíza no fin do noso camiño coresmal: a festa da Pascua. Porque, como nos lembra o papa Francisco: «A esperanza cristiá consiste precisamente nisto: ante a morte, onde parece que todo acaba, recíbese a certeza de que, grazas a Cristo, á súa graza, que nos foi comunicada no bautismo, a vida non remata, senón que se transforma para sempre».
A cinza é unha chamada á conversión. Nese sentido, o Papa, na súa mensaxe para a Coresma deste ano, convídanos a descubrir algunhas chamadas á conversión que nos farán moi ben. A primeira, a sentirnos peregrinos, camiñantes: é importante non deternos, facer un proceso de liberación e de camiño cara á liberdade e a misericordia. Ás veces detémonos na nosa zona de confort e non nos aventuramos a saír en busca de novos proxectos persoais e comunitarios de encontro con Cristo e de evanxelización.
A segunda, a reflexionar sobre a nosa capacidade de acollida, de traballo conxunto e comunitario, de sinodalidade. Nunha sociedade individualista, a Coresma é tempo para redescubrir a importancia de acoller a todos, de coidar a comunidade e camiñar xuntos en Igrexa. Por último, a de edificar un mundo desde a esperanza: isto é, desde a confianza en Deus e na súa gran promesa, a vida eterna, que impulsa nun decidido compromiso pola xustiza, a fraternidade e o coidado da casa común.
Un bo camiño para percorrer e facelo xuntos. Este é o meu desexo. O teu irmán e amigo,
Fernando García Cadiñanos
Bispo de Mondoñedo-Ferrol
Estará dedicada á figura de Leopoldo Calvo-Sotelo, xa que neste 2026 cúmprese o centenario do nacemento de quen fora presidente do Goberno. No acto interviñeron o presidente do RCNR, Pablo Fernández, o director territorial de Deportes da Xunta, Manuel Otero, un dos fillos do tamén alcalde honorario de Ribadeo Víctor Calvo-Sotelo, e o rexedor ribadense, Dani Vega. Todos exaltaron a práctica deportiva na ría, a labor desenvolvida polo Real Club Náutico e a vinculación de Leopoldo Calvo-Sotelo co estuario. Entre o público asistente estaban máis membros da familia Calvo-Sotelo, directivos e ex directivos do RCNR, edís de Ribadeo e representantes de Acisa.
O grupo, composto por cinco mulleres e sete homes cunha media de 26 anos, foi recibido pola subdelegada do Goberno, Olimpia López, que lles agradeceu o compromiso co servizo público e destacou o papel esencial da Policía Nacional na seguridade cidadá. Oito axentes estarán na Comisaría de Lugo, dous en Monforte e dous en Viveiro. Ao finalizar as prácticas, escollerán destino definitivo segundo a puntuación obtida no proceso selectivo.
A iniciativa busca poñer en valor a diversidade cultural do municipio a través da gastronomía, convidando ás persoas de diferentes países a elaborar pratos típicos que se ofrecerán de forma gratuíta ao público. O Concello asumirá o custo dos ingredientes e asignará a cada participante un posto identificado co seu país de orixe. As inscricións poden realizarse ata o 29 de xullo enviando un correo a feiras@vilalba.es. Rouco chamou á participación para seguir construíndo unha Vilalba aberta e integradora, nunha feira que quere consolidarse como espazo de convivencia e dinamización da feira tradicional.
Ata o 4 de agosto poderán realizarse as renovacións, mantendo as tarifas aprobadas en asemblea: 200 € e 250 € para adultos, e acceso gratuíto para menores grazas ao convenio coa Fundación Imdecum, con opción voluntaria de abono infantil por 40 € con reserva de asento. A partir do 5 de agosto activaranse as novas altas. Os abonos poderán tramitarse a través de CLUBER ou presencialmente na oficina do club, con horario de mañá e tarde en xullo e só de mañá en agosto.
A Presidenta Carmela López destacou o valor deste produto emblemático da Mariña e o traballo do sector pesqueiro. Rocío Rivera e Herminia Pernas puxeron en valor a tradición mariñeira de Burela e o papel dos mariñeiros da Moncloa. O público degustou 450 tapas elaboradas con bonito nunha xornada que serviu de escaparate desta cita gastronómica e de convite a visitar Burela a próxima fin de semana.
As crianzas desfrutaron dunha refrescante xornada con inchables e xogos acuáticos na contorna do complexo deportivo da Veiga.
Trátase dunha mostra de 28 fotografías de gran formato do naturalista Ezequiel Martínez que reivindica a diversidade e a conservación da fauna salvaxe. A iniciativa, organizada polo Concello da Pastoriza en colaboración con ABANCA e Afundación dentro do proxecto Corrente cultural, poderá visitarse de balde ata o 26 de agosto. As imaxes, acompañadas de textos divulgativos elaborados por especialistas de Naturnova, amosan especies emblemáticas como o oso pardo, a cegoña, o cervo ou a aguia imperial, convidando a reflexionar sobre a importancia de protexer o patrimonio natural.
