Mogo: “En Lugo hai máis efectivos da Garda Civil con Sánchez que con Rajoy”

A Mariña, 4 de xuño, 2026. O senador socialista César Mogo acusou aos representantes do PP por Lugo de “manipulación” e de tentar “alarmar á veciñanza con informacións sesgadas”, asegurando que “teñen as patas curtas”.

Segundo explica, “por moito que xoguen a confundir cos catálogos e as vacantes, o que ocultan —e sábeno porque lles informou o Goberno— é que na provincia de Lugo existen hoxe 28 efectivos máis da Garda Civil que cando gobernaba o PP”.

Mogo subliña que a cidadanía tamén debe coñecer que a porcentaxe de ocupación do catálogo da Garda Civil en Lugo é superior á media estatal. “Sábeno os senadores do PP, porque lles informou o Goberno, pero ocultárono aos veciños e veciñas de Lugo”, afirma.

O senador lembra que entre 2012 e 2018, durante os gobernos do PP, se perderon en España máis de 13.000 efectivos de Garda Civil e Policía, cunha media de 1.800 axentes menos cada ano. Pola contra, desde 2018 —cos gobernos de Pedro Sánchez— ofertáronse 46.000 novas prazas. “Co PP desapareceron miles de prazas; co PSOE creáronse até superar o máximo histórico de axentes. Tamén o sabían os senadores do PP”, engade.

Mogo explica que, con calquera goberno, os catálogos non se cobren ao 100% por razóns de xestión de persoal, “algo que probablemente ignoren os senadores do PP”.

O senador considera “indignante e vergoñento” que o afán do PP por atacar ao Goberno os leve a formular preguntas “sen xustificación posible cando falamos de seguridade cidadá”. Lembra que os datos relativos a postos concretos das comandancias están protexidos pola Lei de Segredos Oficiais. “É unha auténtica irresponsabilidade que non respecten estas limitacións, vixentes desde hai moitos anos. A ansia por sacar cabeza levounos demasiado lonxe”, afirma.

Mogo conclúe que a veciñanza de Lugo debe saber que “con este Goberno hai máis efectivos da Garda Civil que co Goberno do PP. A súa tranquilidade merece a verdade”.